Ushtria amerikane ka rrëzuar më shumë dronë iranianë, të cilët ka thënë se po kërcënonin anijet në pikën e bllokimit të transportit detar në Ngushticën e Hormuzit.
"Më herët sot, forcat amerikane në Lindjen e Mesme rrëzuan dy dronë sulmi iranianë me një drejtim që kërcënonin trafikun ndërkombëtar detar në Ngushticën e Hormuzit", ka thënë Komanda Qendrore e SHBA-së të shtunën në një postim në X.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoUshtria ka shtuar se mbetet e gatshme të "vazhdojë mbrojtjen kundër agresionit iranian".
Rrëzimi i dronëve vjen pasi SHBA-ja rrëzoi katër dronë në një sulm tjetër të premten.
Ndërkohë, SHBA-ja raportohet se po planifikon të lejojë që asetet iraniane të përdoren për të mbështetur riparimet në shtetet e Gjirit, të prekura nga sulmet e ardhshme iraniane, ka thënë një burim.
E ministri i Brendshëm i Pakistanit, Mohsin Naqvi, është në Iran për negociata të mëtejshme. Sulmet e fundit kanë rritur tensionet në armëpushimin e brishtë midis Uashingtonit dhe Teheranit.
Irani thotë se qëndrimet “kontradiktore” të SHBA-së janë problemi kryesor në negociata
Photo: Associated Press
Zëdhënësi i ministrisë së Jashtme të Iranit, Esmail Baghaei, ka deklaruar se problemi kryesor në negociatat me Shtetet e Bashkuara është ndryshimi i vazhdueshëm dhe kundërthënës i qëndrimeve amerikane.
Duke folur për CNN në Teheran të dielën, Baghaei ka thënë se shkëmbimi i mesazheve mes dy vendeve po vazhdon përmes ndërmjetësve pakistanezë.
“Problemi kryesor i negociimit me këtë administratë është se duhet të përballesh me shumë qëndrime që ndryshojnë vazhdimisht, me zhvendosje të kushteve, deklarata të ndryshme dhe komente kontradiktore nga zyrtarë të ndryshëm. Kjo e bën të gjithë procesin shumë të vështirë”, ka thënë ai.
Sipas Baghaeit, ekzistojnë disa pika të rëndësishme mosmarrëveshjeje, por “çështja kryesore është që amerikanët duhet të kuptojnë se duhet të njohin të drejtat e Iranit”, përfshirë të drejtën për pasurim bërthamor për qëllime paqësore, sipas traktatit ndërkombëtar për mospërhapjen e armëve bërthamore.
“Në të njëjtën kohë, kur flasin për asetet tona të bllokuara, ata nuk po na japin asnjë lëshim”, ka shtuar ai.
Irani po kërkon që SHBA-ja të pranojë zhbllokimin e miliarda dollarëve asete iraniane të ngrira në banka të huaja.
CNN ka raportuar të dielën se SHBA-ja po planifikon të përdorë asetet iraniane për të mbështetur rindërtimin në vendet e Gjirit që mund të preken nga sulme të ardhshme iraniane, sipas një burimi të njohur me qëndrimin e Sekretarit amerikan të Thesarit, Scott Bessent.
Sipas të njëjtit burim, Departamenti i Thesarit do të shqyrtojë gjithashtu përdorimin e aseteve iraniane për riparimin e dëmeve të shkaktuara nga sulmet e mëparshme.
“SHBA-ja thjesht duhet t’i ndalojë sanksionet”, ka thënë Baghaei.
“Sa u përket sanksioneve dhe aseteve të bllokuara, ata thjesht duhet të lejojnë që asetet iraniane të lirohen dhe të jenë në dispozicion të iranianëve.”
Baghaei gjithashtu ka akuzuar SHBA-në se nuk po e respekton armëpushimin që ka hyrë në fuqi në prill.
“Ata kanë sulmuar anijet tona tregtare, si në Ngushticën e Hormuzit ashtu edhe në ujërat ndërkombëtare”, ka deklaruar ai.
Sipas tij, situata mbetet shumë e paqëndrueshme dhe e rrezikshme dhe se kjo vjen si rezultat i “qasjes së papërgjegjshme të Shteteve të Bashkuara ndaj rajonit dhe armëpushimit”.
Nga ana tjetër, ushtria amerikane ka deklaruar se mbetet e gatshme të “vazhdojë mbrojtjen kundër agresionit iranian” në rajonin e Gjirit dhe ka njoftuar se të shtunën në mbrëmje rrëzoi edhe dy dronë iranianë që konsideroheshin kërcënim për trafikun detar.
SHBA-ja synon përdorimin e aseteve iraniane për riparimin e dëmeve tek aleatët e Gjirit
Photo: Associated Press
SHBA-ja do të përpiqet të ridrejtojë asetet iraniane drejt shteteve të Gjirit për rindërtim dhe riparimin e dëmeve të shkaktuara nga Irani, ka thënë një burim i njohur me çështjen, ndërsa Teherani zyrtar ka vazhduar me lëshime të tjera dronësh pas një vale sulmesh ndaj Kuvajtit dhe Bahreinit.
Sekretari i Thesarit i SHBA-së, Scott Bessent, ka urdhëruar një ekip të vlerësojë kostot e dëmeve që Irani u ka shkaktuar aleatëve të Gjirit, ka thënë burimi të shtunën, duke shtuar se SHBA-ja do të shqyrtojë përdorimin e aseteve iraniane edhe për riparimin e çdo shkatërrimi të ardhshëm, raporton Reuters.
Ky zbulim erdhi një ditë pasi Mohsen Rezaei, këshilltar i udhëheqësit suprem të Iranit, i ka thënë CNN-it se një marrëveshje paqeje për t’i dhënë fund luftës tremujore varej nga lirimi i 24 miliardë dollarëve të aseteve iraniane të ngrira nga Shtetet e Bashkuara.
Burimi nuk ka specifikuar se çfarë lloji asetesh po shqyrtonte Departamenti i Thesarit.
Kërcënimi për të ridrejtuar asetet iraniane mund të krijojë një burim të ri tensioni për armëpushimin e brishtë midis SHBA-së dhe Iranit, i cili u vu sërish në provë këtë fundjavë me sulme nga të dyja palët.
Negociatat e paqes duket se kanë ngecur, megjithëse një ministër nga Pakistani, i cili vepron si ndërmjetës, ka udhëtuar të shtunën drejt Teheranit me një letër për udhëheqësin suprem të Iranit, Ajatollah Mojtaba Khamenei, ka raportuar agjencia gjysmëzyrtare iraniane ISNA.
Forcat amerikane kanë goditur herët të shtunën stacione radarike bregdetare iraniane në Goruk dhe në Ishullin Qeshm, të dyja në Ngushticën e Hormuzit, pasi rrëzuan dronë të lëshuar nga Irani që, sipas Komandës Qendrore Amerikane (CENTCOM), përbënin kërcënim për trafikun detar. Ushtria amerikane ka thënë vonë të shtunën se ka rrëzuar edhe dy dronë të tjerë sulmues iranianë që kërcënonin anijet në ngushticë.
Garda Revolucionare e Iranit tha se u kundërpërgjigj duke sulmuar bazat amerikane në Kuvajt dhe Bahrein. Ushtria e Kuvajtit njoftoi se kishte neutralizuar shtatë raketa balistike që kaluan mbi zona të banuara, duke shkaktuar dëme materiale, por jo viktima.
Në Bahrein u dëgjuan sirenat e alarmit dhe banorëve iu kërkua të strehoheshin. Si Kuvajti ashtu edhe Bahreini i dënuan sulmet.
Më vonë, Irani ka thënë se kishte goditur bazat amerikane në të dy vendet me raketa balistike, por ushtria amerikane ka deklaruar se gjashtë raketa u interceptuan dhe e shtata nuk kishte arritur objektivin.
SHBA-ja dhe Irani kanë zhvilluar negociata kryesisht indirekte për një marrëveshje të përkohshme që do t’i jepte fund luftës tremujore, duke lënë çështje si programi bërthamor iranian për negociata të mëtejshme.
Megjithatë, një marrëveshje ka mbetur e paarritshme, ndërsa të dyja palët janë përplasur herë pas here.
Teherani kërkon qasje në miliarda dollarë të ardhura nga nafta, përjashtime nga sanksionet ndaj eksporteve të naftës së papërpunuar, heqjen e bllokadës amerikane ndaj porteve të tij dhe ndikim mbi Ngushticën e Hormuzit. Irani e ka bllokuar efektivisht këtë rrugë ujore, përmes së cilës kalonte rreth një e pesta e trafikut global të naftës para luftës.
Ndërkohë, presidenti amerikan, Donald Trump, po përballet me presion në rritje në politikën e brendshme për shkak të rritjes së çmimeve të karburanteve dhe për t’i dhënë fund luftës.
Ai i ka thënë NBC-së se, megjithëse shumica e objekteve iraniane për prodhimin e dronëve dhe raketave janë shkatërruar, iranianët ende kanë në dispozicion rreth një të pestën e arsenalit të tyre raketor.
“Kanë ende disa raketa dhe disa dronë. Do të thosha se u kanë mbetur rreth 21% deri në 22% e raketave. Është ende një numër i madh raketash, por jo ai që kishin kur ne sulmuam për herë të parë”, ka thënë Trumpi për NBC, sipas fragmenteve të publikuara nga rrjeti të premten.
Konflikti ka rritur çmimet e naftës dhe ka nxitur inflacionin në mbarë botën.