Motoçiklistët Owen Jenner dhe Shane Richardson kanë humbur jetën tragjikisht gjatë një aksidenti në garën e sotme të British Superbike në “Oulton Park”, raporton “The Sun”.
Jenner 21-vjeçar dhe Richardson 29-vjeçar u përfshinë në incidentin e tmerrshëm, ku u rrëzuan 11 garues.
Në deklaratë zyrtare, “MotorSport Vision Racing” (MVR), konfirmoi lajmin për vdekjen e motoçiklistëve.
“Ky aksident katastrofal rezultoi tragjikisht me lëndime fatale të dy garuesve, dhe një tjetër ka marrë lëndime të rënda”, tha MVR.
Për Jennerin u tha se mori lëndime të rënda të kokës, si pasojë e të cilave vdiq në qendër mjekësore. Ndërsa për Richardsonin u tha se mori lëndime të rënda në gjoks dhe vdiq me të arritur në Spitalin në Stoke.
Motoçiklisti Tom Tunstall mori lëndime serioze në këtë rrëzim.
Gara u ndërpre.
