Abrashi: BE-ja ka paraparë projekte për hekurudhat – amerikanët do të bëjnë rehabilitimin

Ministri i Infrastrukturës, Arban Abrashi, ka nisur raportimin në Komisionin parlamentar për Bujqësi, Pylltari, Zhvillim Rural, Infrastrukturë dhe Mjedis lidhur me marrëveshjet nga takimi i Washingtonit për ndërtimin e akseve rrugore dhe hekurudhore.

Abrashi ka përmendur projektet që kanë prezantuar në SHBA.

“Projekti i parë ka të bëjë me ndërtimin e akseve rrugore dhe linjave ajrore, sipas letrave të qëllimit të mirë. Pastaj ndërtimi i autostradës Besi deri në Merdare, projekt i cili është i gatshëm për implementim. Projekti i dytë ka të bëjë me ndërtimin e hekurudhës nga Prishtina deri në Merdare me gjatësi prej 45 km”, tha Abrashi, transmeton KOHA.

Abrashi ka thënë se pasi që BE-ja ka paraparë projekte për hekurudhat nga jugu në veri, amerikanët, sipas tij do të kujdesen për të rehabilituar rrjetin e hekurudhave nga perëndimi në lindje.

Abrashi ka folur edhe për mundësinë që Kosova të ketë dalje në detin Adriatik.

“Çka është me rëndësi të përmendet për projektin e autostradës dhe hekurudhës, Kosova përmes projekteve të financuara nga BE-ja është duke rehabilituar infrastrukturën nja jugu në veri, kurse shteti amerikan në perëndim dhe lindje. Në kuadër të lidhjes së Prishtinës me detin Adriatik ne kemi paraqitur idenë për një port të thellë. Ky port do të bënte konkurrencë edhe ndaj porteve tjera në Mesdhe. Projektet tjera janë të cilat i kemi prezantuar gjatë takimeve me korporatat amerikane. Projekte tjera që nuk janë pjesë e marrëveshjes por qe janë diskutuar anash, ne do të diskutojmë projekte tjera që mund të nxisin zhvillimin ekonomik. E kemi diskutuar ndërtimin e autostradës nga Bresalci deri në Dheun e Bardhë, kemi diskutuar edhe për Brezovicën”, shtoi Abrashi.

Kryetari i Komisionit, Liburn Aliu, ka pyetur Abrashin se a do të vazhdojë përtej Mitrovicës hekurudha Han i Elezit - Leshak.

“Ky shteti i mini-shengenit që ka me na heq Doganat i bie që kemi me importuar mallra nga Subotica. Nëse mallrat e Evropës hyjnë përmes Suboticës, atëherë krejt mallrat e Azisë do të hyjnë përmes Pirotit”, tha ai.

Ndërkaq, Abrashi ka thënë se projekti i ndërtimit të hekurudhës nga Hani i Elezit deri në Leshak po vazhdon.

“Unë nuk jam i kënaqur me tempon e punimeve, aktualisht është e kontraktuar pjesa nga Hani i Elezit deri në Fushë-Kosovë. Koha e realizimit të fazës së parë ka kaluar mbi 50 për qind kurse niveli i punëve është i ulët, nën 10 për qind. Janë thirrur në pandemi. Faza e dytë është në proces final të përzgjedhjes së kompanisë dhe duhet të fillojë para vitit të ri, për rehabilitimin e infrastrukturës nga Fushë-Kosova në Mitrovicë. Faza e tretë është në studim të fizibilitetit. Ka studim, por duhet më detajisht që nënkupton efektin mjedisor. Besoj që tenderi, nëse punojmë me trysni stabile, në pranverë shpallim tenderin për Mitrovicë-Leshak. Nuk ka asnjë devijim prej trasesë për lidhjet e Kosovës me korridoret evropiane”, tha Abrashi.

Deputeti i PDK-së, Bajrush Xhemaili, ka thënë se këto projekte janë vetëm në favor të Serbisë.

“Marrëveshja ka qenë shumë e favorshme për Serbinë kurse simbolike për ne. Serbia po e realizon një ëndërr për të dalë në det, me autostradë e hekurudhë. Kjo do të jetë e dëmshme për ne. Krejt këto lidhjet derisa nuk njihemi e kemi shumë problem politikisht. Nuk po e di ka i marrin”, tha Xhemaili.