Agjencia për Informim dhe Privatësi (AIP) e ka gjobitur Komunën e Fushë-Kosovës me 4 mijë euro, pasi nuk ka lejuar qasje në dokumente publike. Kërkesën për qasje e ka bërë këshilltari komunal i Vetëvendosjes në këtë Komunë, Vlonjat Hasani.
Ai ka thënë se Komuna po mundohet t’ua pamundësojë qasjen qytetarëve në, siç ka thënë, “punët e dyshimta” të saj.
“Ata (zyrtarët komunalë) vazhdojnë të shkelin ligje, të thyejnë rregulla e rregullore, e të mohojnë qasje në dokumentet publike për qytetarët. Krejt kjo për t’i pamundësuar opinionit informimin për punët e dyshimta dhe të dëmshme që ata i bëjnë! Agjencia për Informim dhe Privatësi, sot i ka shqiptuar gjobë Komunës, konkretisht Kryetarit Burim Berisha në vlerë prej 4.000€ për kufizim të qasjes në dokumente publike për kërkesat që i kam drejtuar Komunës”, ka thënë këshilltari Hasani.
Ndërkohë në vendimin e AIP-së dërguar kryetarit të Komunës, Burim Berisha, thuhet se është shqiptuar gjobë ndaj Komunës së Fushë-Kosovës për moszbatimin e vendimit të Agjencisë për Informim dhe Privatësi Nr. A-49/2023 të datës 22.03.2023, në shumën prej 4 mijë eurosh, për kufizim të qasjes në dokumente publike.
“Obligohet Komuna e Fushë-Kosovës që shumën prej 4,000.00€ (katërmijë eurosh) ta paguajë në afat prej 30 ditësh në xhirollogarinë e autoritetit kompetent për shqiptimin e gjobës nr. 1000400070005127/ Banka Qendrore e Republikës së Kosovës”, thuhet në vendim.
AIP-ja ka njoftuar se përmes Departamentit për Qasje në Dokumente Publike, sipas ankesës nr.49, të ushtruar nga Vlonjat Hasani ndaj Komunës së Fushë-Kosovës, ka iniciuar shqyrtimin e ankesës në fjalë, sipas procedurave të brendshme të kësaj Agjencie.
“Në kuadër të këtij procesi, AIP-ja më22 mars 2023, ka nxjerrë vendimin A-49/2023, përmes të cilit ka obliguar institucionin tuaj të ofrojë qasje në dokumentet objekt kërkese. Institucioni juaj ka heshtur ndaj vendimit të AIP-së së karakterit detyrues edhe pas afatit ligjor prej shtatë ditësh kalendarike duke dështuar në këtë mënyrë të zbatojë atë për t'i ofruar palës ankuese qasjen e kërkuar në dokumentet përkatëse sipas nënparagrafit 3.2 të nenit 17 Ligjit për qasje në dokumente publike, të cilat lidhen me marrëdhënien e punësimit”, theksohet në këtë dokument. “Si rrjedhojë e moszbatimit të vendimit të datës 22 mars 2023 nga ana e Komunës së Fushë-Kosovës, Agjencia për Informim dhe Privatësi duke zbatuar paragrafin 3 të nenit 32 të Ligjit Nr.06/L-081 për Qasje në Dokumente Publike, njofton zyrtarin kryesor administrative të institucionit publik që nuk ka zbutuar plotësisht këtë vendim që të shfrytëzojë afatin prej shtatë (7) ditësh për të përmirësuar shkeljen e evidentuar në vendimin e lartcekur para se të shqiptojë gjobë administrative sipas paragrafit 1 dhe 3 të nenit 32 të Ligjit Nr.06/L-081) për Qasje në dokumente publike”, thuhet tutje.
Lidhur me këtë gjobë KOHA është në pritje të përgjigjeve nga Komuna e Fushë-Kosovës.