KMDK-ja: Deponia në Sferkë menaxhohet nga KRU “Ambienti”, me aksionare kryesore Komunën e Pejës

Kompania për Menaxhimin e Deponive në Kosovë (KMDK) ka reaguar pas zjarrit në deponinë në fshatin Sferkë të Pejës.

Në reagim thuhet që deponia nuk është nën menaxhimin e KMDK-së por të Kompanisë Regjionale të Mbeturinave “Ambienti”, ku Komuna e Pejës është aksionari kryesor.

Paraprakisht, ministrja në detyrë e Mjedisit, Fitore Pacolli dhe deputetja e zgjedhur e Lidhjes Demokratike të Kosovës, Hykmete Bajrami, janë përplasur pasi kjo e fundit ka dorëzuar Kallëzim Penal për mosmenaxhimin e asaj deponie dhe dëmin që iu shkaktohet banorëve, veçanërisht nga tymi i saj tashmë që po digjet. Pacolli i është kundërpërgjigjur se deponia nuk menaxhohet nga ministria por niveli lokal.

“Ajo menaxhohet nga Kompania Regjionale e Mbeturinave 'Ambienti', ku Komuna e Pejës është aksionari kryesor. Përfaqësuesit e KMDK-së kanë vizituar deponinë dhe janë njoftuar nga afër me gjendjen e krijuar. Me këtë rast, KMDK ka shprehur gatishmërinë për ta mbështetur KRM “Ambienti” me kapacitetet e saj profesionale dhe teknike, me qëllim që zjarri të vihet sa më shpejt nën kontroll dhe të shuhet plotësisht, gjë që e ka bërë edhe në të kaluarën”, thuhet në reagim.