KQZ-ja pritet të mos i angazhojë komisionerët e dyshuar për manipulim

Anëtarë të KQZ-së kanë bërë të ditur se brenda institucionit po zhvillohen diskutime që personave të përfshirë në manipulimin e votave në zgjedhjet e 28 dhjetorit, të mos u lejohet angazhimi si komisionerë në zgjedhjet e 7 qershorit. Një vendim i tillë tashmë është marrë për vëzhguesit, për jo edhe për komisionerët të cilët kanë rol kyç në numërimin e votave

Personave të përfshirë në manipulim të rezultateve zgjedhore nuk do t’u mundësohet më që të angazhohen si komisionerë në zgjedhjet e radhës të parakohshme më 7 qershor, kanë thënë anëtarë të Komisionit Qendror të Zgjedhjeve.

Ndonëse të mërkurën e shkuar, KQZ-ja ka ndryshuar rregulloren për vëzhguesit me anë të së cilës ka ndaluar përfshirjen e atyre që janë të dënuar ose janë nën hetime për shkelje zgjedhore, një vendim i tillë ende nuk është marrë për komisionarët.

Anëtari i KQZ-së nga radhët e LVV-së, Alban Krasniqi, ka bërë të ditur se pas diskutimeve mes anëtarëve, pritet që një filtër i ngjashëm të aplikohet edhe për komisionerët.

“Por që qëllimi i të gjithë neve të përfshirë në këtë debat është që të mos u japim hapësirë personave që kanë qenë të involvuar gjatë procesit të numërimit gjatë procesit të numërimit dhe për të cilët janë ngritur, qoftë aktakuza apo edhe që kanë qenë të arrestuar në këtë rast nga policia përmes vendimeve të organeve përkatëse të drejtësisë”, ka thënë Krasniqi.

Sipas një raporti të Demokracisë në Veprim, gjatë procesit të numërimit në zgjedhjet e 28 dhjetorit janë manipuluar rreth 250 mijë vota për kandidatë. 

Kjo ka çuar në arrestimin e qindra komisionerëve si dhe një numri më të vogël të vëzhguesve. 
Sipas anëtarit tjetër të KQZ, Ilir Gashi (PDK), meqë data e zgjedhjeve tashmë është caktuar, nuk është e mundur që të ndryshohet rregullorja për komisionarët, mirëpo sipas tij, komisioni mund të nxjerrë vendim për të marrë masa që ta mbrojë integritetin e zgjedhjeve. 

Gashi ka thënë qëndrimi i tij është që personat e përfshirë në manipulime gjatë procesit të kaluar, të mos mund të angazhohen në grupe numëruese në Qendrat Komunale të Numërimit.

“Mendoj që të gjithë ata që janë nën hetime dhe janë në procese gjyqësore, jo nuk do të duhej, por nuk mund të jenë pjesë e punës si komisioner në këto zgjedhje”, ka thënë Gashi.

E Krasniqi (VV) ka thënë që komisioni ka marrë masa që të shmanget edhe numri i lartë i votave me asistencë. 

“Nxjerrja e dokumenteve të rrejshme nga disa qendra komunale të mjekësive familjare që kanë lëshuar dëshmi apo vërtetime për persona që gjoja nuk kanë aftësi të caktuara që të mund të votojnë që është komplet e kundërligjshme në raport edhe me ligjet që rregullojnë çështjet shëndetësore”, ka thënë Krasniqi.

Për dallim nga vëzhguesit, të cilët kanë vetëm detyrën e monitorimit dhe raportimit e shkeljeve gjatë procesit, komisionerët menaxhojnë vendvotimet dhe janë drejtpërdrejt përgjegjës për numërimin e votave.

KQZ-ja javën e shkuar ka ndryshuar katër rregullore, me qëllimin për të evituar parregullsitë që kanë përcjellë procesin zgjedhor të 28 dhjetorit. 

Ndryshimet parashohin auditim të procesit të numërimit, filtra për vëzhguesit, vënie pragu për numrin minimal të votuesve në seli diplomatike dhe kritere për vërtetimin e paaftësisë për të votuar.