Në një bashkëbisedim në podcastin PIKË me publicistin Veton Surroi, inxhinieri Agron Dida, ka dhënë tri këshilla për transformimin e arsimit në Kosovë, duke theksuar se sistemi arsimor duhet të adaptohet me ndryshimet e mëdha globale dhe teknologjike, duke mos harruar ruajtjen e identitetit kombëtar.
Dida thekson rëndësinë e pranimit të ndryshimeve radikale të paradigmave globale, duke i përshkruar ato si një “cunami” që përmbys çdo gjë dhe kërkon adaptim. Ai nënvizon se edukimi është themeli i këtij ndryshimi dhe se adaptimi i nxënësve dhe i sistemit arsimor ndaj këtyre ndryshimeve është domethënës për të siguruar suksesin.
Ai propozon rikonfigurimin e universiteteve dhe institucioneve arsimore, duke u bazuar te fleksibiliteti dhe inovacioni. Sipas tij, koncepti tradicional i universiteteve si “tempuj të diturisë” duhet të ndryshojë; programet mësimore dhe doktoraturat mund të zhvillohen në mënyra më të shpejta dhe praktike, duke përfituar nga teknologjitë moderne dhe inteligjenca artificiale, por duke ruajtur cilësinë e aftësimit.
Dida theksoi rëndësinë e ruajtjes së dimensionit njerëzor dhe identitar në arsimin e Kosovës. Ai thotë se arsimtarët dhe nxënësit duhet të kujdesen për vetveten dhe për kombin, duke ruajtur gjuhën, kulturën dhe historinë kombëtare, si elemente fundamentale që duhet të integrohen në mësimdhënie dhe praktikat arsimore. Ai thekson gjithashtu nevojën për të sjellë ekspertë të kualifikuar në vend dhe për të reduktuar emigrimin e trurit nga Kosova.
