Në Podujevë rrugët të kalueshme, por kërkohet kujdes nga vozitësit

Kujdes gjatë ngasjes së automjeteve është kërkuar nga zyrtarët komunalë të Podujevës pas reshjeve të borës që kanë filluar nga mbrëmja e së hënës dhe kanë vazhduar edhe të martën paradite. Zëdhënësi i Komunës së Podujevës, Fatri Zhitia, ka thënë se kompania e kontraktuar ka intervenuar aty ku ka pasur nevojë për hapjen e rrugëve nga bora.

“Gjendja në Komunën e Podujevës pas reshjeve të borës është plotësisht e menaxhueshme. Ne kemi një kontratë aktive për mirëmbajtjen dimërore të rrugëve dhe nga mbrëmja e kaluar kemi përcjell situatën në terren për të intervenuar aty ku ka nevojë. Meqenëse orëve të fundit nuk kemi pasur reshje të borës, gjendja e rrugëve është stabilizuar dhe qarkullimi është duke u zhvilluar normalisht. Megjithatë kërkojmë nga ana e qytetarëve dhe veçanërisht vozitësve të kenë kujdes të shtuar gjatë qarkullimit”, ka thënë Zhitia.

Ndërkohë, nëpërmjet një njoftimi edhe Komuna e Obiliqit tregon se janë duke i pastruar sheshet dhe trotuaret nga bora.

“Me fillimin e reshjeve të borës, Drejtoria e Shërbimeve Publike dhe Emergjencës në bashkëpunim me NPL ‘Kastrioti’ sha.a. kanë filluar aksionin për pastrimin e shesheve dhe trotuareve nga bora qysh në orët e para të mëngjesit”, thuhet në njoftim.