-
Nga:
Majlinda Ibrahimi
- 13 prill 2023 22:44
- Shpërndaje në:
Në një konferencë për media, të enjten, Nagavci ka thënë se premtimin e saj synon ta realizojë përmes ndërtimit të çerdheve të parafabrikuara, të cilave mund t’u ndërrohet lokacioni, sipas nevojës së popullatës, por edhe të ndërtohen shpejt
Për dy vjet pushtet u funksionalizuan katër çerdhe, e për dy të tjerat ministrja e Arsimit, Shkencës, Teknologjisë dhe Inovacionit, Arbërie Nagavci, beson se do të realizojë premtimin për hapjen e 160 çerdheve të reja.
Në një konferencë për media, të enjten, Nagavci ka thënë se premtimin e saj synon ta realizojë përmes ndërtimit të çerdheve të parafabrikuara, të cilave mund t’u ndërrohet lokacioni, sipas nevojës së popullatës, por edhe të ndërtohen shpejt.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“Çerdhet e parafabrikuara janë një trend i cili është në rritje gjithandej në botë, sepse jemi në kuadër të agjendës së gjelbër, pra luajnë të gjithë parametrat e rëndësishëm, e shkurtojnë dukshëm kohën e ndërtimit të çerdheve. 80 për qind e tyre ndërtohen kryesisht në fabrika, duke ruajtur kështu edhe ambientin, kanë mundësi të transportohen nga një vendbanim në tjetrin, varësisht nga lëvizja e popullatës. Karakteristikë kjo shumë e rëndësishme, sidomos për ndërtimin e objekteve në viset rurale”, ka thënë ajo.
Nagavci u shpreh se është bërë shpallja për kompaninë që do t’i projektojë e mbikëqyrë ndërtimin e çerdheve të parafabrikuara.
“Në momentin që ne kemi kërkesa specifike nga komunat, e kemi të gatshme kompaninë që të bëjë ndërtimin e objekteve të parafabrikuara. Siç e thashë, kohëzgjatja e ndërtimit të tyre është dukshëm më e shkurtër se klasiket, për 4-6 muaj finalizohen. Në të njëjtën kohë mund të jenë më shumë se një çerdhe që punohen”, ka thënë ministrja.
Po ashtu, realizimin e premtimit Nagavici synon ta bëjë edhe përmes adoptimit të shkollave në çerdhe, si dhe ndërtimin e objekteve në mënyrë klasike.
“Ndërtimin e çerdheve e kemi fokusuar në tri drejtime kryesore: ndërtimi i çerdheve të reja, në vendet ku kemi lokacionet e dorëzuara nga komunat. Jemi duke punuar edhe në adoptimin e objekteve ekzistuese për t'i shndërruar ato në çerdhe të reja, si dhe do të fillojmë punën e ndërtimit të çerdheve të parafabrikuara”, ka shtuar ajo.
E mësimdhënësit që konsiderohen “tepricë teknologjike” pritet të rikualifikohen për të punuar në çerdhet e reja.
“Ne edhe për këtë vit kemi buxhetuar, kemi planifikuar, do të thotë punësimin e stafit që do të jetë në çerdhe. Por, përveç kësaj, ashtu siç e kemi bërë të ditur, do të punojmë në rikualifikimin e stafit në mënyrë që ata që janë tepricë teknologjike të rikualifikohen për punën që mund të jenë të afërta, me profesionin që e kanë përfunduar”, ka treguar ajo.
Sipas saj, në proces të ndërtimit janë 19 objekte të reja për institucionet e nivelit parashkollor, e në planifikim për sivjet janë edhe 17 godina të reja.
Vetëm 6.7 për qind e fëmijëve nën 5 vjeç në Kosovë ndjekin edukimin e hershëm në çerdhe, tregojnë të dhënat e Ministrisë së Arsimit, Shkencës, Teknologjisë dhe Inovacionit. E, sipas Agjencisë së Statistikave, në Kosovë janë rreth 130.000 fëmijë të kësaj moshe.
Përfshirja e ulët e fëmijëve në edukimin parashkollor është një vërejtje që është përsëritur disa vjet radhazi nga Komisioni Evropian, në raportet e progresit.