Përplasje verbale mes Ahmetit e Azemit në diskutimin për buxhet

Kryetari i Prishtinës, Shpend Ahmeti, është përplasur verbalisht me këshilltarin komunal të Vetëvendosjes, Egzon Azemi, gjatë seancës së jashtëzakonshme për miratimin e buxhetit të vitit 2021.

Ahmeti pasi diskutoi me këshilltarët e LDK-së, të cilët kërkuan shtyrjen e kësaj seance, është ngritur nga ulësja e tij për të lëshuar seancës. Gjatë largimit ai i është afruar Azemit i cili e quante atë “rrenc” dhe e akuzonte se ka larguar një person nga puna. Këtu Ahmeti ka shkëmbyer disa fjalë me Azemin dhe më pas është larguar nga seanca.

Seanca ka shkuar në pauzë dhe përfaqësuesit e partive janë mbledhur për të arritur një dakordim rreth miratimit te buxhetit.

Ndërkaq, pas përplasjes, përmes një postimi në Facebook, Azemi ka thënë se është kërcënuar nga Ahmeti.

LDK-ja kërkoi që seanca të shtyhet pasi përfaqësues të saj u ankuan se janë njoftuar vonë për mbajtjen e seancës dhe se nuk kanë pasur kohë të analizojnë buxhetin. Shtyrjen e seancës e kërkuan edhe PDK-ja dhe grupi i pavarur i këshilltarëve komunalë. Ndërsa, kryetari Ahmeti ka thënë se seanca nuk mund të shtyhet.