-
Nga:
Fisnik Minci
- 22 shkurt 2023 20:32
- Shpërndaje në:
Punimet për pastrimin e rrugës nga rrëshqitja e dheut në njërën pjesë të segmentit Suharekë-Prizren të autostradës “Ibrahim Rugova” kanë vijuar të mërkurën. Plani i Ministrisë së Infrastrukturës është që kjo pjesë të hapet për qarkullim në orët e mbrëmjes.
Segmenti nga Suhareka deri në Prizren në autostradën “Ibrahim Rugova” ka vazhduar të jetë i mbyllur për qarkullimin e automjeteve gjatë ditës së mërkurë, si pasojë e rrëshqitjes së dheut. Punimet për pastrimin e kësaj pjese kanë vijuar nga operatori për mirëmbajtjen e autostradës, ndërkaq kahu nga Prizreni në drejtim të Prishtinës është i lirë për qarkullim.
Menaxheri i autostradës nga Ministria e Infrastrukturës, Ferit Tafallari, ka treguar se rrëshqitja në kilometrin e 26-të në anën e majtë të drejtimit Vërmicë-Gjurgjicë ka ndodhur të martën rreth orës 16:40, dhe se për shkaqe sigurie është mbyllur qarkullimi rrugor dhe kanë filluar punët për pastrim.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“E kemi orientuar komunikacionin, e kemi zgjidhur problemin e komunikacionit, e kemi drejtuar në drejtim tjetër, nga Suhareka deri në (Prizren) veri dhe menjëherë kanë filluar punimet e kompanisë për mirëmbajtjen e autostradës, të cilën rrëshqitje jemi duke e eliminuar. Po shpresojmë deri në orët e mbrëmjes ta pastrojmë dhe do ta orientojmë komunikacionin që të qarkullojë lirshëm”, ka thënë Ferit Tafallari, menaxher i autostradës nga MMPHI-ja.
Sipas tij, rrëshqitjet e tilla të dheut janë të natyrshme dhe ato shkaktohen nga ujërat atmosferike.
“Kjo që ka ndodhur është prej ujërave atmosferike. Janë sende të zakonshme që ndodhin. Këtu është e vërtetë që dje nuk ka pasur të reshura, por siç jeni të informuar të reshura ka pasur para një muaji, vërshime kemi pasë, dhe dheu i cili është në atë pjesë të autostradës është dhe, i cili e pi ujin dhe me ngopjen e dheut, pas një kohe ka ardhur deri te rrëshqitja”, ka thënë Tafallari.
Policia e autostradës të martën dhe të merkurën ka asistuar në rregullimin e komunikacionit, ndërkaq Ministria e Infrastrukturës ka kërkuar mirëkuptimin e të gjithë qytetarëve që e shfrytëzojnë këtë rrugë, që nga Suhareka deri në Prizren ta shfrytëzojnë rrugën nacionale N25, deri në pastrimin e plotë, që planifikohet të përmbyllet në orët e mbrëmjes.