Shiu e turbullon ujin, dubravasit në Kaçanik furnizohen nga burimi që e ndërtuan vetë

Nga ky burim furnizohen me ujë mbi tre mijë banorë të fshatit Dubravë të Kaçanikut.

Por gjendja e tij higjienike, sipas banorëve, nuk është aspak e mirë.

Fshatarët ankohen se çdo herë kur ka të reshura, uji që e përdorin për pije u vjen me baltë.

Fajin për këtë, ata ia lënë edhe ujit të përroit të fshatit, nga i cili thonë se furnizohen përmes një gypi, kur bie niveli i burimit, raporton KTV.

Tutje, banorët tregojnë se përderisa burimi nuk është i mbuluar sa duhet, aty gjejnë gjallesa të ndryshme.

Kryetari i Kaçanikut, Besim Ilazi, thotë se ky burim është ndërtuar nga vetë banorët.

Ai bën të ditur se së shpejti do të lëshojnë në funksion pusin e ri, nga i cili do të furnizohen me ujë Dubrava dhe disa fshatra të tjerë.

Por, objekti i ndërtuar së fundmi për përpunimin e ujit është pothuajse i shkatërruar.

Disa dyer të demoluara e disa të vjedhura, e bëjnë këtë objekt të qasshëm ndaj ndotjes dhe kafshëve të ndryshme.

Sipas kryetarit Ilazi, ky objekt është dëmtuar dy herë nga qytetarët.