Shtimja aktivizon ekip profesional për identifikimin e fëmijëve me aftësi të kufizuara

Komuna e Shtimes ka angazhuar një ekip profesional të përbërë nga pedagogë e psikologë, për identifikimin e fëmijëve me aftësi të kufizuara. Synimi i kësaj ndërmarrjeje është që ata të mund të integrohen në shoqëri, duke u përfshirë në shkolla me bashkëmoshatarë të tyre. Deri më tash, ky ekip ka identifikuar gjithsej 26 fëmijë të këtillë, por një pjesë e prindërve të tyre po e kundërshtojnë vlerësimin e komisionit.

Drejtoria e Arsimit në Komunën e Shtimes ka themeluar një ekip të veçantë prej pesë anëtarësh, të përbërë nga pedagogë e psikologë, për identifikimin e fëmijëve me aftësi të kufizuara dhe për integrimin e tyre në shoqëri nëpër shkolla.

Ky ekip ka për qëllim që t’i bëjë vlerësimin dhe rivlerësimin e këtyre fëmijëve. Krahas nxënësve nëpër shkolla, ekipi profesional ka identifikuar edhe katër fëmijë me aftësi të kufizuara në çerdhen publike në Shtime.

Mirëpo, drejtori i Arsimit në Komunën e Shtimes, Lulzim Sahiti, ka thënë se ekipi është përballur me telashe, meqë një pjesë e prindërve nuk pranojnë që fëmijët e tyre kanë probleme dhe se janë me aftësi të kufizuara.

“Në bazë të të dhënave që i kemi marrë nga ekipi, i cili është duke punuar në terren, është e vërtetë se ka prindër që nuk pranojnë të bashkëpunojnë me ekipin për shkaqe të ndryshme, megjithëse është numër i vogël. Unë kisha apeluar te secili prind që ta ndihmojë këtë ekip, sepse kjo bëhet në të mirën e fëmijëve. Andaj, nëse bashkëpunojnë do të arrijnë si të gjithë fëmijët në procesin arsimor”, ka thënë Sahiti.

Besnik Shala, koordinator i ekipit, ka thënë se puna nuk mund të kryhet pa pëlqimin nga prindërit.

“Ky proces nuk realizohet pa pëlqimin e prindit, përkatësisht prindërve, ndërkohë, pasi që kemi konstatuar si procedurë se rasti është i kompletuar, kemi evidentuar 26 kërkesa që kanë nevojë për vlerësim dhe jemi duke punuar që nga data 15 nëntor dhe kemi realizuar diku 12 vlerësime”, ka deklaruar Shala.

Psikologia Bedrije Amrushi-Arifi ka bërë të ditur se me anë të punës së ekipit është hasur edhe në disa raste kur fëmijët kanë hezituar që t’i pranojnë mes tyre fëmijët me aftësi të kufizuara.

“Fillimi është me rezistencë në pranim, mirëpo me trajnimin e mësimdhënësve për gjithëpërfshirje, për fëmijët me aftësi ndryshe, pastaj me punën e gjithë akterëve të shkollës si asistentë, mësues mbështetës dhe të gjitha këto të tjera, punohet me këta nxënës që brenda muajit të përshtaten fëmijët për t’i pranuar këta fëmijë në shoqëri”, ka thënë Amrushi-Arifi.

Lidhur me problematikën, prindërit që kanë fëmijë me aftësi të kufizuara nëpër shkolla të Shtimes, nuk kanë pranuar që të flasin për KOHËN.