U premtuan 160 çerdhe e u hapën 29

Hapja e 160 çerdheve ka qenë objektiv i Qeverisë për mandatin e shkuar. Por, janë hapur vetëm 29 sosh. Në Kosovë janë gjithsej 65 institucione parashkollore publike, për të cilat njohësit e arsimit thonë se mbetet e paqartë cilësia e shërbimeve që ofrojnë

Në pesë vjetët e fundit në Kosovë janë hapur 29 institucione të reja parashkollore.

Prej tyre, 12 çerdhe të reja janë ndërtuar nga Ministria e Arsimit, ndërsa 11 shkolla janë adaptuar në çerdhe për fëmijë. Vetëm gjatë vitit të kaluar janë ndërtuar edhe 6 çerdhe me financim nga Bashkimi Evropian përmes programit IPA 2016.

Megjithatë, ky numër mbetet shumë më i ulët se 160, sa ishte paraparë në programin qeverisës.

Ministria e Arsimit dhe Shkencës (MASH) fajësoi komunat, për mospërmbushjen e këtij objektivi.

“Arsye kryesore është mungesa e lokacioneve dhe lejeve të ndërtimit nga komunat respektive për çerdhet e reja të planifikuara në ligjin e buxhetit sepse aktualisht Ministria ka të planifikuara në ligjin e buxhetit ndërtimin edhe të 28 çerdheve të tjera të reja si dhe 4 adaptime të shkollave në çerdhe. Aktualisht janë të kontraktuara dhe në ndërtim 27 çerdhe të reja, dhe në proces të adaptimit 5 shkolla në çerdhe me investime nga MASHTI”, thuhet në përgjigjen e ministrisë.

Në Kosovë janë gjithsej 65 institucione parashkollore publike, prej të cilave 41 janë objekte amë, ndërsa 24 funksionojnë si paralele të ndara.

Hanë Zylfiu-Hazirit, e cila është menaxhere e projekteve në Qendrën e Arsimit për Kosovën (KEC), thotë se ky numër mbetet i pamjaftueshëm përballë kërkesës në rritje për çerdhe.

“Kjo nuk mbulon kërkesën dhe nevojat të cilat paraqiten si nga prindërit që fëmijët e tyre të përfshihen nëpër institucione parashkollore, por edhe nga ajo se komunat çfarë ofrojnë më shumë. Edukimi parashkollor është shumë më rëndësi për fëmijët e vegjël sidomos për moshën disa vite para fillimit të shkollimit”, ka thënë Zylfiu-Haziri.

Ajo thekson se mbetet e paqartë edhe cilësia e shërbimeve që ofrohen në çerdhet ekzistuese, pasi nuk ka inspektorë të veçantë që merren vetëm me institucionet parashkollore.

“Tash duhet të flasim se çka po ju ofrojmë atyre fëmijëve? A ka cilësi në ato klasa? A ofrohet programi adekuat, pavarësisht që e kemi kurrikulën, por sa janë të përgatitura edukatoret? Apo po bëjmë ndonjëherë edhe replika të klasës së parë?”, ka thënë Zylfiu-Haziri. “Nuk kemi sistem që e kontrollon se çka në atë ambientin ‘e bukur’ ofrohet”.

Sipas statistikave të Ministrisë së Arsimit për vitin shkollor 2024-2025, në institucionet parashkollore në Kosovë janë të punësuar 678 edukatore dhe 4 edukatorë.