Aktivistët e flotës së ndihmave për Gazën dërgohen në Kretë pas ndërhyrjes së Izraelit

Më shumë se 100 aktivistë pro-palestinezë, që ndodheshin në anije me ndihma që po shkonin drejt Gazës, u dërguan të premten në ishullin grek të Kretës, pasi forcat izraelite i ndaluan flotën e tyre në ujërat ndërkombëtare pranë Greqisë.

Këta aktivistë ishin pjesë e një flote të dytë, e organizuar nga aktivistë ndërkombëtarë që mbështesin Palestinën. Qëllimi i tyre ishte të çonin ndihma humanitare në Gaza dhe të sfidonin bllokadën izraelite.

Anijet u nisën nga porti i Barcelonës në Spanjë më 12 prill.

Të premten, një anije e ushtrisë izraelite transferoi 168 persona nga këto anije në anije greke.

Më pas ata u dërguan në breg në Kretë, ku i prisnin autobusë dhe një ambulancë. Kjo u konfirmua nga vetë organizatorët e këtij misioni dhe nga pamjet e agjencisë Reuters.

Sipas organizatorëve të flotës, dy aktivistë mbetën në duart e autoriteteve izraelite.
Një burim, që kërkoi të mbetet anonim, tha se 22 anije ishin ndaluar nga Izraeli, ndërsa 47 të tjera vazhdojnë të lundrojnë në jug të Kretës dhe planifikojnë të ankorohen aty përpara se të vazhdojnë drejt Gazës.

Çdo anije transporton rreth një ton ushqime, pajisje mjekësore dhe ndihma të tjera.
Organizatorët thanë se 22 anijet u sekuestruan nga Izraeli të mërkurën vonë, në ujërat ndërkombëtare pranë gadishullit të Peloponezit në Greqi, qindra milje larg Gazës.

Ministria e Jashtme e Izraelit i quajti organizatorët “provokatorë profesionistë”, ndërsa ministritë e Jashtme të Gjermanisë dhe Italisë deklaruan se po e ndjekin situatën me shqetësim të thellë.

Në një deklaratë të enjten, Departamenti Amerikan i Shtetit paralajmëroi se mund të ketë pasoja ndaj atyre që mbështesin flotën, duke e cilësuar atë si pro-Hamas.

Aktivistët pro-palestinezë kundërshtojnë këtë qëndrim, duke thënë se mbështetja e tyre për të drejtat e palestinezëve po ngatërrohet padrejtësisht me mbështetje për Hamasin.

Tetorin e kaluar, ushtria izraelite ndaloi një flotë të mëparshme të organizuar nga i njëjti grup, duke arrestuar aktivisten suedeze Greta Thunberg dhe më shumë se 450 pjesëmarrës.

Ndërkohë, palestinezët dhe organizatat ndërkombëtare të ndihmës thonë se furnizimet që arrijnë në Gaza mbeten të pamjaftueshme, pavarësisht një armëpushimi të arritur në tetor që parashikonte shtim të ndihmave.