-
Përktheu:
Flutura Gashi-Mehmeti
- 4 nëntor 2025 15:05
- Shpërndaje në:
Bashkimi evropian ka vlerësuar të martën progresin e Ukrainës në reformat për t’u bashkuar me bllokun, pavarësisht shqetësimeve mbi përpjeket e saj për ta luftuar korrupsionin.
BE-ja po ashtu ka lëshuar paralajmërime të ashpra për kandidatët Serbinë dhe Gjeorgjinë në lidhje me prapambetjen demokratike.
Në një seri raportesh për zgjerimin, dega ekzekutive e bllokut, Komisioni Evropian, ka vlerësuar gjithashtu se Mali i Zi mund të përfundojë bisedimet e anëtarësimit në BE deri në fund të vitit të ardhshëm, duke e lënë të parin në radhë për t'u bërë vendi i 28-të anëtar.
Raportet vjetore për 10 vende, shumica e tyre në Ballkanin Perëndimor, vijnë me procesin e zgjerimit të BE-së pothuajse të bllokuar. Kroacia ishte vendi i fundit që është bashkuar, 12 vjet më parë.
Franca, veçanërisht, ka këmbëngulur se BE-ja është shumë e vështirë dhe duhet të reformohet vetë përpara se të pranojë më shumë vende në bord. Vetot kombëtare të ushtruara nga Hungaria dhe gjithnjë e më shumë nga Sllovakia kanë ngadalësuar vendimmarrjen dhe veprimin në bllokun më të madh tregtar në botë.
Perspektiva e anëtarësimit në BE është një nxitës i fuqishëm i reformës pro-demokratike, dhe bashkimi nxit tregtinë dhe krijon vende pune. Por shpresat në Ballkan kanë rënë nga dështimi i bllokut për të përmbushur angazhimet e tij.
Pothuajse katër vjet pas pushtimit në shkallë të plotë të Rusisë, komisioni ka vlerësuar Ukrainën për avancimin e reformave më të rëndësishme. Por ka thënë se është bërë "përparim i kufizuar" në luftën kundër korrupsionit.
Një projektligj i parë si minues i pavarësisë së agjencive kundër korrupsionit shkaktoi një protestë publike këtë vit dhe protestat e para të mëdha që nga fillimi i luftës, përpara se të tërhiqej.
Komisioni Evropian ka vënë në dukje se agjencitë dhe grupet e shoqërisë civile raportojnë presion në rritje nga shteti dhe shërbimet e sigurisë. Sipas tij “këto zhvillime hedhin dyshime mbi angazhimin e Ukrainës ndaj agjendës së saj kundër korrupsionit".
Megjithatë, komisioni ka thënë se Ukraina është e përkushtuar ndaj "qëllimit ambicioz" të përfundimit të bisedimeve të pranimit deri në fund të vitit 2028. Për të përmbushur qëllimin, ka thënë Brukseli, "kërkohet një përshpejtim i ritmit të reformave, veçanërisht në lidhje me sundimin e ligjit".
Në një postim në Telegram, presidenti Volodymyr Zelensky e ka përshëndetur raportin si "provë se edhe pse vazhdon të mbrohet kundër agresionit në shkallë të plotë rus, Ukraina vazhdon të reformohet dhe të ndryshojë në përputhje me standardet evropiane".