Bideni dhe Trumpi pranojnë ftesën e CNN-it për debat më 27 qershor

Presidenti amerikan, Joe Biden dhe ish-presidenti Donald Trump kanë pranuar një ftesë nga CNN-i për të debatuar më 27 qershor, një përballje historike e hershme, që do të vendosë tonin për muajt e fundit të fushatës 2024.

“Kam marrë dhe kam pranuar një ftesë nga CNN-i për një debat më 27 qershor. Te ju, Donald. Siç thatë ju: kudo, në çdo kohë, në çdo vend”, ka shkruar Bideni në një postim në X.

Edhe Trumpi më vonë i ka thënë Kaitlan Collins të CNN-it se "Përgjigja është po, unë do të pranoj".

Bisedat jozyrtare midis zyrtarëve të fushatave të Bidenit dhe Trumpit rreth debateve janë zhvilluar javët e fundit dhe janë fokusuar kryesisht në një përbuzje të ndërsjellë për Komisionin për Debatet Presidenciale dhe skenarët e mundshëm për të punuar rreth komisionit, i thanë CNN-it tri burime të njohura me diskutimet. 

Washington Post ishte i pari që raportoi për ato biseda.

Sipas një njoftimi nga CNN-i, debati do të mbahet në studiot e rrjetit në Atlanta pa praninë e audiencës – një anomali në debatet mes kandidatëve presidencialë. 

Debatet e para presidenciale televizive, mes John F. Kennedy dhe Richard Nixon në vitin 1960, u zhvilluan në studio televizive pa praninë e audiencës live. Debatet nuk u zhvilluan më deri në zgjedhjet e vitit 1976 dhe që atëherë u zhvilluan përpara audiencave të drejtpërdrejta.

“Moderatorët për debatin dhe detajet shtesë do të vijnë më vonë”, thuhet në njoftim.