Kremlini këmbëngul në tërheqjen e Ukrainës nga Donbasi

Kremlini ka thënë të hënën se Ukraina duhet të tërheqë trupat e saj nga pjesa e Donbasit që ende e kontrollon nëse dëshiron paqe.

Sipas Kremlinit, nëse Kievi nuk arrin një marrëveshje, atëherë do të humbasë edhe më shumë territor.

Putini dhe Trumpi kanë zhvilluar një bisedë telefonike të dielën përpara takimit të presidentit amerikan në Miami me presidentin ukrainas, Volodymyr Zelensky. 

Zëdhënësi i Kremlinit, Dmitry Peskov, ka thënë se një tjetër telefonatë është planifikuar të ndodhë shumë shpejt.

Peskovi ka refuzuar të komentojë mbi idenë e një zone të lirë ekonomike në Donbas ose mbi të ardhmen e termocentralit bërthamor Zaporizhzhia, i cili kontrollohet nga Rusia, duke thënë se Kremlini e konsideron të papërshtatshme.

Kur është pyetur për vërejtjet e ndihmësit të Kremlinit, Yuri Ushakov, në lidhje me vendimin që Kievi duhej të merrte për Donbasin, Peskov ka thënë se Ukraina duhet të tërheqë trupat e saj nga pjesët që ende kontrollon.

"Po flasim për tërheqjen e forcave të armatosura të regjimit nga Donbasi", ka thënë Peskov. 

Rusia aktualisht kontrollon një të pestën e Ukrainës, përfshirë Krimenë të cilën e ka aneksuar në vitin 2014, rreth 90% të Donbasit, 75% të rajoneve të Zaporizhzhisë dhe Khersonit, dhe pjesë të rajoneve të Kharkivit, Sumit, Mykolaivit dhe Dnipropetrovskit, sipas vlerësimeve ruse.Rusia pretendon se Donbasi, Zaporizhzhia dhe Khersoni janë pjesë e Rusisë, megjithëse shumica e vendeve i konsiderojnë rajonet pjesë të Ukrainës.