Një delegacion ukrainas po qëndron në SHBA për të diskutuar fundin e luftës

Presidenti i Ukrainës, Volodymyr Zelensky, ka thënë të shtunën se një ekip ukrainas është takuar me të dërguarin special të SHBA-së, Steve Witkoff, dhe dhëndrin e presidentit të SHBA-së, Donald Trump, Jared Kushner, për bisedime që synojnë t’i japin fund pushtimit të Ukrainës nga Rusia.

"Është e rëndësishme për të gjithë ne në botë që diplomacia të vazhdojë. Ne po përpiqemi t'i japim fund kësaj lufte, luftës së Rusisë kundër Ukrainës", ka thënë Zelensky.

Zelensky ka shtuar se bisedimet do të vazhdojnë të dielën.

"Gjëja më e rëndësishme është të kuptohet se sa e gatshme është pala ruse të shkojë deri në fundin e vërtetë të luftës", ka deklaruar ai.

Zelensky ka thënë të enjten vonë se kishte dërguar një delegacion në SHBA në një përpjekje për të çuar përpara bisedimet e pezulluara të ndërmjetësuara nga SHBA-ja për t'i dhënë fund pushtimit të Rusisë.

Bisedimet trepalëshe që përfshijnë Rusinë, të cilat ende nuk kanë prodhuar ndonjë përparim në çështjet kryesore, kanë mbetur të ngrira ndërsa lufta e Iranit ka marrë vëmendjen ndërkombëtare.

Zelensky ka thënë se qëllimi kryesor i takimit ishte të sigurohej që bisedimet trepalëshe të rifillonin dhe që Uashingtoni të vazhdonte të lejonte vendet e tjera të NATO-s të blinin armë amerikane për t'i dërguar në Ukrainë.

Zëdhënësi i Kremlinit, Dmitry Peskov, ka thënë të premten se një rund i ri negociatash të ndërmjetësuara nga SHBA-ja midis Moskës dhe Kievit ka të ngjarë të zhvillohet së shpejti.

Zyrtarët e Evropës Perëndimore e kanë akuzuar vazhdimisht presidentin rus, Vladimir Putin gjatë vitit të kaluar se po zvarrit negociatat, ndërsa përpiqet të shtyjë përpara iniciativën e ushtrisë së tij më të madhe në fushën e betejës dhe të pushtojë më shumë tokë ukrainase. 

Forcat ruse mbajnë gati 20% të Ukrainës.