Putini njofton testimin e dronit nënujor me energji bërthamore

Rusia ka kryer një provë të suksesshme të një droni të ri nënujor me energji atomike dhe i cili mund të përmbajë armë bërthamore, ka thënë të mërkurën presidenti Vladimir Putin, duke deklaruar se ai nuk mund të interceptohet.

Njoftimi i Putinit vjen vetëm pak ditë pasi ai përshëndeti një provë të suksesshme të një rakete të re lundrimi me energji bërthamore.

Putini ka thënë se droni "Poseidon" u testua për herë të parë të martën, duke e përshkruar atë si një "sukses të madh". Ai tha se "Poseidon" është i pakrahasueshëm në shpejtësi dhe thellësi dhe "nuk ka asnjë mënyrë për ta interceptuar atë".

“Fuqia e prodhuar nga Poseidon tejkalon ndjeshëm atë të raketës sonë më të përparuar me rreze ndërkontinentale, Sarmat”, ka shtuar presidenti rus.

Duke zhvilluar stërvitje bërthamore dhe duke u mburrur për një provë të suksesshme të raketave dhe dronëve të rinj, Putini po i dërgon një mesazh presidentit të SHBA-së Donald Trump se Moska nuk do të detyrohet të bëjë lëshime për Ukrainën, raporton AP.

Edhe Botë 8 muaj më parë Trump: Putini ta ndalë luftën në Ukrainë në vend se të testojë raketa bërthamore

Përballë thirrjes së Trumpit për një armëpushim të shpejtë dhe sanksioneve të reja të ashpra të SHBA-së mbi industrinë e naftës së Rusisë, Putini po ua kujton përsëri SHBA-së dhe aleatëve të tjerë perëndimorë të Kievit, arsenalin e tij bërthamor për të mbështetur kërkesat e tij të kahershme maksimaliste.

Ai ka thënë se Ukraina duhet të tërheqë forcat e saj nga katër rajonet që Rusia i ka aneksuar në mënyrë të paligjshme, por që nuk i ka pushtuar kurrë plotësisht, si dhe të braktisë përpjekjen e saj për t'u bashkuar me NATO-n, kërkesa të refuzuara nga Kievi dhe aleatët e saj perëndimorë.