Mbyllet Qeveria amerikane

Qeveria amerikane ka ndërprerë shumicën e operacioneve të saj të mërkurën, pasi përçarjet e thella partiake penguan Kongresin dhe Shtëpinë e Bardhë të arrinin një marrëveshje financimi, duke shkaktuar atë që mund të jetë një ngërç i gjatë dhe i mundimshëm e që mund të çojë në humbjen e mijëra vendeve të punës federale.

Nuk ka ende një rrugë të qartë për të dalë nga ngërçi, teksa agjencitë kanë paralajmëruar se mbyllja e 15-të e qeverisë që nga viti 1981 do të ngadalësojë udhëtimet ajrore, do të pezullojë kërkimin shkencor, trupat amerikane do të mbeten pa paga dhe do të çojë në suspendimin nga puna të 750,000 punonjësve federalë me një kosto ditore prej 400 milionë dollarësh, ndër të tjera.

Trump, fushata e të cilit për të riformësuar rrënjësisht qeverinë federale është tashmë në rrugën e duhur për të larguar rreth 300,000 punonjës deri në dhjetor, i ka paralajmëruar demokratët e Kongresit se mbyllja e qeverisë mund të hapë rrugën për veprime "të pakthyeshme", duke përfshirë shkurtimin e më shumë vendeve të punës dhe programeve. 

Mbyllja ka fillur disa orë pasi Senati ka hedhur poshtë një masë afatshkurtër shpenzimesh që do të kishte mbajtur operacionet qeveritare në zhvillim deri më 21 nëntor.

Demokratët e kundërshtuan legjislacionin për shkak të refuzimit të republikanëve për të bashkëngjitur një zgjatje të përfitimeve shëndetësore për miliona amerikanë të cilat do të skadojnë në fund të vitit.
Republikanët thonë se çështja duhet të trajtohet veçmas.

Analistët e pavarur paralajmërojnë se mbyllja mund të zgjasë më shumë se mbylljet e lidhura me buxhetin në të kaluarën, teksa zyrtarët e Trumpit dhe të Shtëpisë së Bardhë kërcënojnë të ndëshkojnë demokratët me shkurtime në programet qeveritare dhe në pagat federale.