Kontrata e re për Hajdarin, lajm i mirë edhe për Kosovën

Vetëm tetë muaj pasi u transferua te Hoffenheimi, Albian Hajdari ka firmosur kontratë të re me klubin e Bundesligës gjermane.

Hoffenheimi të premten njoftoi për vazhdimin e kontratës me mbrojtësin 22-vjeçar. Pos për Hajdarin e Hoffenheimin, ky është lajm shumë i mirë edhe për Kosovën.

Hajdari, që gradualisht po shndërrohet në lider të mbrojtjes së Kosovës, ka dëshmuar që i takon nivelit elitar evropian. Dhe një tjetër mbrojtës i nivelit elitar evropian është me shumë rëndësi për Kosovën. Ai do të vazhdojë të paraqitet në njërin prej kampionateve më cilësore në Evropë, ndërsa kontrata e re është edhe dëshmi që rruga e Hajdarit është vetëm për më lart, e jo në drejtim të kundërt.

Majtaku më 25 gusht të vitit të kaluar ishte transferuar nga Lugano e Zvicrës te Hoffenheimi. Menjëherë u stabilizua në përbërjen bazë të Hoffenheimit, që po e kërkon një vend që dërgon në Ligën e Kampionëve në edicionin e ardhshëm.

Nuk ndodh shpesh që një futbollist të firmosë kontratë të re afatgjatë dhe me kushte të përmirësuara, ende pa e bërë një vit në klubin me të cilin edhe ashtu ka kontratë për shumë vjet.

Por Hoffenheimi ka dashur të vazhdojë rritjen duke siguruar edhe për shumë vjet mbrojtësin cilësor.

Edhe te Hoffenheimi kanë pranuar se me kontratën e re të Hajdarit dëshmojnë ambiciet që kanë.

“Albiani u bashkua me ne pak pasi nisi edicioni aktual dhe shpejt u zhvillua në lojtar vendimtar dhe në pjesë integrale të ekipit tonë. Nga dita e parë ai plotësisht iu përmbajt rrugës sonë dhe paraqitjet e tij kanë kontribuar shumë në suksesin e këtij edicioni”, ka thënë Andreas Schicker, drejtor sportiv i Hoffenheimit.

“Me vetëm 22 vjet, Hajdari ende ka potencial të jashtëzakonshëm për zhvillim. E majta e fortë, fleksibiliteti në mbrojtje dhe mentaliteti i jashtëzakonshëm janë gjërat që e dallojnë atë”.

I lindur në Zvicër, Hajdari e ka bërë zhvillimin si lojtar te Baseli, Juventusi në Itali dhe te Lugano. Ka luajtur për të gjitha grupmoshat e reja të Zvicrës, kurse vjet iu bashkua Kosovës. Tashmë është i pakontestueshëm në mbrojtjen “Dardane”.

Në Bundesligë tashmë i ka 26 ndeshje.

“Ndihem shumë rehat në Hoffenheim. Edhe kur u transferova këtu në verë, shpejt e kam kuptuar se diçka e veçantë po krijohet. Perspektiva është e mirë dhe dua të vazhdoj të kontribuoj në mënyrë aktive në këtë zhvillim pozitiv dhe në sukseset e Hoffenheimit”, ka theksuar Hajdari.

Kontratë të re me Hoffenheimin së shpejti do të firmosë edhe mesfushori Leon Avdullahu. Edhe ai verën e kaluar iu bashkua skuadrës gjermane dhe tashmë është lider i mesfushës së Kosovës. Ndërkohë Fisnik Asllani ka gjasa të mëdha të largohet për te ndonjë top-skuadër evropiane.