Fitore e madhe e Llapit me gol të minutave shtesë

Goli i Fiton Ademit në minutat shtesë ia solli fitoren e vlefshme Llapit.

Llapi të dielën fitoi 2:1 ndaj Dukagjinit në Klinë në kuadër të xhiros së 24-t të Superligës së Kosovës në futboll.

Ndeshja po shkonte drejt barazimit, kur Ademi devijtoi topin për në portë, në minutën e katërt shtesë.

Me fitore, Llapi është forcuar në vendin e shtatë me 29 pikë. Dukagjini është i gjashti me 33 pikë.

Llapjanët shënuan që në minutën e dytë përmes Edon Sadriut për 1:0.

Ndërkohë Hekuran Berisha e barazoi rezultatin në 1:1 në minutën e 54-t.

Por te Llapi vlerësuan se vendasit bënë faul gjatë aksionit që solli goli. Kishte reagime të ashpra të mysafirëve, ndërsa Tahir Batatina dhe ndihmësi i tij, Sunaj Keqi u përjashtuan me kartonë të kuq.

Dukagjini ka humbur penallti në pjesën e parë.

Tjetër karton i kuq për llapjanët

Te Llapi nuk po pajtohen me vendimet e Genc Nuzës pas golit të barzimit të Dukagjinit.

Nuza tashmë ka treguar kartonin e dytë për shtabin teknik të llapjanëve.

Llapjanët pretendojnë se kishte faul nga Dukagjini para aksionit që solli golin e Dukagjinit.

Reagime të Llapit, përjashtohet Batatina

Ka tensione në Klinë pas golit të Dukagjinit për 1:1.

Llapjanët kanë reaguar në vendimet e gjyqtarëve, përkatësisht për një faul gjatë ndërtimit të aksionit të golit të klinasve.

Për shkak të reagimeve, Tahir Batatina u ndëshkua me karton të kuq.

Barazon Dukagjini

Dukagjini e ka barazuar rezultatin në ndeshjen ndaj Llapit.

Për 1:1 shënoi Hekuran Berisha në minutën e 54-t.

Llapi në avantazh ndaj Dukagjinit në Klinë

Një gol i konfirmuar nga VAR-i bëri dallimin në pjesën e parë të ndeshjes Dukagjini – Llapi.

Edon Sadriu shënoi për 1:0 në të mirë të Llapit që në minutën e dytë.

Ndërkohë Dukagjini humbi penallti më pas.

Me rezultatin 1:0 në të mirë të Llapit ka përfunduar pjesa e parë.

Llapi kalon në epërsi në Klinë

Llapi ka kaluar në epërsi 1:0 ndaj Dukagjinit në Klinë.

 Që në minutën e dytë Edon Sadriu realizoi për llapjanët.