Krizë fertiliteti – studimi zbulon se nivelet e testosteronit te burrat janë përgjysmuar

Nivelet mesatare të testosteronit tek burrat janë përgjysmuar gjatë 50 vjetëve të fundit, sipas shkencëtarëve, të cilët paralajmërojnë se shoqëria po përballet me një krizë të fertilitetit mashkullor.

Nivelet totale të testosteronit tek burrat kanë rënë me 54% midis viteve 1972 dhe 2019, sipas të dhënave të paraqitura të martën në takimin vjetor të Shoqatës Evropiane për Riprodhimin Njerëzor dhe Embriologjinë në Londër, raportoi Guardian. 

Rritja e shkallës së obezitetit dhe diabetit duken të kenë luajtur një rol në këtë rënie, por ekipi që qëndron pas studimit sugjeron se faktorë mjedisorë, si kimikatet që ndërhyjnë në funksionimin normal të hormoneve, të cilat gjenden në shumë produkte të përdorimit të përditshëm, si dhe ngrohja globale, mund të kenë gjithashtu ndikim në këtë rënie.

Këto rezultate pritet të konsiderohen si një kontribut i rëndësishëm në debatin e gjerë shkencor mbi pyetjen nëse fertiliteti mashkullor është në rënie dhe cilat janë arsyet.

Studime të mëparshme nga i njëjti grup kërkimor, të cilat arritën në përfundimin se numri i spermatozoideve ka rënë ndjeshëm gjatë 40 vjetëve të fundit, kanë tërhequr vëmendje të madhe publike. Sekretari amerikan i Shëndetësisë, Robert F. Kennedy Jr., së fundmi e ka cilësuar rënien e fertilitetit mashkullor si "një problem ekzistencial".

Lidhja ndërmjet testosteronit dhe shëndetit të burrave është e ndërlikuar dhe funksionon në të dy drejtimet. Testosteroni rregullon prodhimin e spermës; ndikon në dëshirën seksuale; ndihmon në ndërtimin e masës muskulore;  ruan dendësinë e kockave; luan rol në humor, nivelin e energjisë dhe metabolizmin. 

Nga ana tjetër, faktorë shëndetësorë si obeziteti, ku yndyra e tepërt trupore rrit shndërrimin e testosteronit në estrogjen, mund të çojnë në uljen e niveleve të testosteronit.

Të dhënat sugjerojnë se ritmi i kësaj rënieje të testosteronit është përshpejtuar pas vitit 2000.