Harrison Ford nuk do të pensionohet, ani se ka kaluar gjysmë shekulli në Hollywood

Aktori legjendar, Harrison Ford, thotë se nuk ka ndërmend të tërhiqet nga aktrimi, edhe pse tashmë ka kaluar më shumë se gjysmë shekulli në Hollywood dhe ka interpretuar disa nga personazhet më të njohura në historinë e kinemasë.

“Pa punën time, vërtet nuk do ta dija çfarë të bëja me veten. Unë e dua shumë këtë punë. Ajo ndryshon vazhdimisht, ndryshojnë njerëzit, ndryshon misioni dhe mundësitë, dhe kjo e bën jetën interesante”, ka thënë aktori 83-vjeçar, ka shkruar NPR.

Rruga e Fordit drejt suksesit nuk ka qenë e lehtë. Në fillim të karrierës ai kishte vështirësi të gjente role dhe për vite me radhë punoi herë pas here si mjeshtër druri, para se të merrte rolin që do ta ndryshonte jetën.

Ai u bë i famshëm me personazhin e Han Solo në filmin e parë të sagës “Star Wars”, të realizuar nga regjisori George Lucas. Më pas, ai u bë një nga yjet më të mëdhenj të Hollywoodit me serinë “Indiana Jones” dhe filmin fantastiko-shkencor “Blade Runner”.

Fordi njihet edhe për faktin se shpesh i kryen vetë skenat e rrezikshme në filma.

“Nuk dua që fytyra e personazhit të fshihet sepse në vendin tim është një dublant. Dua që publiku ta ndiejë goditjen. Dua që ta shohë ankthin. Dua që ata të jenë aty kur merret një vendim ose kur humbet një vendim”, ka thënë ai.

Së fundmi, Fordi luan në serialin e Apple TV+, “Shrinking”, ku interpreton një psikolog të quajtur Paul, i cili diagnostikohet me sëmundjen e Parkinsonit.

Ai ka thënë se autorët e serialit nuk i kanë treguar ende se si do të zhvillohet sëmundja e personazhit të tij.

“Ashtu si një pacient i vërtetë me Parkinson, nuk e di se çfarë do të vijë më pas. Po jetoj me simptomat që më janë përshkruar deri tani”, ka thënë ai.

Së fundmi, aktori u emocionua gjatë një ceremonie ku mori një çmim për arritje jetësore në “Actors Awards”.

“Fjalimi që kisha shkruar nuk ishte menduar të ishte emocional, thjesht më ndodhi. U ndjeva pak në siklet, sepse kam përvojë me këto gjëra dhe zakonisht përpiqem të mos më pushtojnë emocionet”, ka thënë ai.

Ford ka treguar edhe një histori interesante nga koha kur po punonte si mjeshtër druri dhe rastësisht u gjend në një moment që i ndryshoi jetën.

“Isha duke pastruar dyshemenë kur hyri George Lucas. Unë isha aty me rripin e veglave të mjeshtrit të drurit, dhe po fshija. Disa javë më vonë më kërkuan të lexoja tekstin me aktorët që po testoheshin për rolet. Asnjëherë nuk më thanë se po konsiderohesha edhe unë për rolin”, ka  kujtuar ai.

Ai shton se në një nga versionet e fundit të audicioneve, personazhi i Han Solo mund të ishte luajtur nga aktori Christopher Walken.

“Gjithmonë më ka argëtuar ideja që Han Solo mund të ishte luajtur nga Chris Walken. Do të kisha dashur shumë ta shihja atë version”, ka thënë ai me humor.

Një nga momentet më të njohura në “Star Wars: The Empire Strikes Back” ishte një improvizim i Fordit.

Në skenën kur Princesha Leia i thotë se e dashuron, ai nuk tha “të dua edhe unë”, siç ishte shkruar në skenar, por u përgjigj thjesht: “E di”.

“Shtysa ishte të qëndroja më shumë në karakter”, ka thënë ai.

Sipas Ford, regjisori George Lucas fillimisht nuk ishte i kënaqur me ndryshimin.

“Por ai më bëri të ulesha pranë tij kur filmi u shfaq për herë të parë në një kinema në San Francisko. Publiku qeshi shumë, dhe kështu ai vendosi ta linte në film”, ka treguar aktori.

Ford është gjithashtu pilot dhe ka pasur një incident serioz gjatë një fluturimi me një aeroplan të vjetër të Luftës së Dytë Botërore.

“Le ta fillojmë duke thënë se ishte një defekt mekanik. Isha rreth 400 metra mbi aeroport kur motori u ndal”, ka thënë ai.

Ai vendosi ta ulte aeroplanin në një fushë golfi për të shmangur shtëpitë dhe rrugët.

“Në vesh më vinte zëri i një mentori të aviacionit që gjithmonë thoshte: ‘Fluturo avionin sa më gjatë të jetë e mundur drejt përplasjes’. Kur ndodhi, nuk ishte një surprizë e plotë, sepse për këtë gjë trajnohesh si pilot”, ka thënë ai.

Ylli ka shtuar se nuk e kujton të ketë pasur shumë frikë në atë moment.

“Lëndimet ishin më serioze nga sa u përshkruan në gazetë, por tani jam shëruar plotësisht. Mora sërish licencën dhe vazhdoj të fluturoj. Nuk jam njeri që kërkon rrezik. Jam një pilot shumë i kujdesshëm”, ka thënë Ford.

Në rininë e tij, Fordi u përball edhe me mundësinë për t’u rekrutuar në ushtri gjatë luftës në Vietnam.

Ai ka punësuar një avokat për të argumentuar se ishte kundër luftës për arsye ndërgjegjeje.

“Shpjegova se nuk kisha një histori të fortë fetare. Nëna ime ishte hebreje, babai katolik”, ka thënë ai duke shtuar se u frymëzua nga mendimi i teologut protestant Paul Tillich.

“Nëse e ke të vështirë fjalën ‘Zot’, merr atë që është më qendrore dhe më kuptimplotë në jetën tënde dhe quaje Zot”, ka thënë ai.

Ford ka treguar se për të, kjo ishte vetë jeta dhe natyra.

“Mendoj se shpjegimi im ishte aq i pazakontë sa thjesht u la mënjanë në ndonjë tavolinë me shumë letra sipër. Në fund, bordi i rekrutimit nuk më kontaktuan më kurrë”, ka thënë ai.