Katër ndeshje evropiane të hendbollit në fundjavë

Palestra “Karagaçi” në Pejë dhe ajo “Bill Clinton” në Ferizaj në fundjavë do të jenë arena të ndeshjeve ndërkombëtare të hendbollit.

Në “Karagaçi”, Istogu e pret skuadrën portugeze 1 Maio/Ada. Istogu garon në raundin e dytë të Kupës Evropiane, që është niveli i tretë i garave kontinentale për klube të hendbollisteve. Ndeshja e parë është të shtunën, prej orës 18:00, ndërsa e dyta të dielën, prej orës 18:00.

Në Istog është hapur palestër e re pak vjet më parë, por për shkak të ndërtimit shumë të keq, që zgjati mbi një dekadë, dhe mirëmbajtjes edhe më të keqe, palestra thuajse është shkatërruar. Gjendja e saj nuk mundëson që të luhen ndeshje evropiane. Për këtë arsye klubi i hendbollisteve Istogu është detyruar të zhvillojë ndeshjet në Pejë.

Në Istog fundjavën e kaluar nuk zhvilloi ndeshje as skuadra e basketbollit nga ky qytet. KB Istogu si vendas luajti në Rahovec në kuadër të Superligës. Është premtuar rinovimi i palestrës në Istog gjatë verës, por kjo nuk ka ndodhur. Dhe si zakonisht, çmimin e paguajnë sportistët.

KHF Istogu për herë të shtatë paraqitet në gara evropiane. Deri më tani në dy raste e ka kaluar nga një kundërshtar. Këtë synim e ka edhe tani. Ndeshjet me skuadrën portugeze pritet të jenë të forta.

Në “Bill Clinton”, dy ndeshje evropiane i luan KHF Ferizaj. Po ashtu në kuadër të raundit të dytë të Kupës Evropiane për hendbolliste, Ferizaj takohet me skuadrën nga Izraeli, Maccabi Arazim Ramat gan. Ndeshja e parë është të shtunën nga ora 20:15, ndërsa e dyta të dielën, nga ora 19:00.

Ferizaj për herë të katërt paraqitet në gara kontinentale. Gjashtë ndeshjet e deritashme i ka luajtur në udhëtim dhe të gjitha i ka humbur me rezultat të thellë. Me skuadrën izraelite ka vendosur të luajë në shtëpi dhe shpreson në suksesin e parë evropian.

Në hendboll është praktikë goxha e shpeshtë që dy ndeshje të luhen në një vend. Kjo bëhet me marrëveshje të klubeve, për të limituar shpenzimet.