-
Nga:
Sanie Jusufi
- 6 korrik 2025 19:15
- Shpërndaje në:
12.8 milionë euro të taksapaguesve janë shpenzuar vjet për qira të institucioneve publike. Ani se kryeministri në detyrë, Albin Kurti, para ardhjes në pushtet e pati premtuar uljen e këtyre shpenzimeve, sipas raportit financiar për vitin 2024, ato janë rritur për 2.3 milionë euro nga viti 2021 dhe për 5 milionë krahasuar me vitin 2024
Afro 12.8 milionë euro të taksapaguesve, vjet shkuan në xhepat e kompanive private, të cilat i lëshuan objektet e tyre me qira për shfrytëzim nga institucionet publike.
Shpenzimet për akomodimin e zyrtarëve publikë brenda një dekade janë rritur për 66 për qind. Më 2014, nga buxheti i shtetit ishin shpenzuar 7.7 milionë euro, e më 2024 kjo shifër shkoi gati në 13 milionë.
Trendi i rritjes së shpenzimeve mori hov më 2019, kur u shpenzuan 10.4 milionë euro.
Atë vit, Albin Kurti, ende në opozitë, pati premtuar se me ardhjen në pushtet asnjë institucion publik nuk do të shfrytëzojë objekte private.
“Qeveria e re ka si prioritet mbi prioritetet zvogëlimin e shpenzimeve qeveritare. Do të fillojmë me objektivin që asnjë institucion publik të mos vendoset nëpër objekte private. Kjo nënkupton që nuk mund të lejojmë rialokime të stafit nëpër ndërtesa vetëm e vetëm për t’i përmbushur apetitet për luks të individëve të caktuar në nomenklaturën politike, e as nevojën për përfitime të paligjshme të pronarëve të objekteve të caktuara private”, pati thënë Kurti më 23 nëntor 2019.
Por, gjatë qeverisjes së tij, shpenzimet për qira të institucioneve publike u rritën për 2.3 milionë euro.
KOHA ka dy javë që ka kërkuar nga Ministria e Punëve të Brendshme informata se cilat institucione janë të vendosura në objekte private dhe nëse ka ndonjë plan për akomodimin e tyre në ato publike, por nuk ka marrë përgjigje.
Dy muaj më parë në objekt me qira është zhvendosur edhe Dhoma e Posaçme e Gjykatës Supreme.
“Hapësira e marrë me qira e ka një sipërfaqe prej 1000 m² dhe shuma mujore e qirasë është 10.500 euro. Kontrata është nënshkruar për periudhën dyvjeçare. Lokacioni ku është vendosur Dhoma e Posaçme e Gjykatës Supreme ndodhet në lagjen “Pejton”. Nuk kemi pasur hapësira tjera publike për akomodim dhe nevoja të gjykatës”, thuhet në njoftimin e Gjykatës Supreme.
Në objekt me qira është edhe Zyra Kombëtare e Auditimit. Ky institucion që nga 2018-ta i paguan 18 mijë e 500 euro në muaj për qira të 3.105 metrave katrorë.
Nga ky institucion kanë bërë të ditur se së fundmi u është bërë zgjidhje dhe pritet të vendosen në hapësirat e kompleksit “ish-Rilindja”.
“Zyra Kombëtare e Auditimit në vazhdimësi ka bërë kërkesa tek institucionet përgjegjëse për zgjidhjen e çështjes së objektit. Pas një periudhe të gjatë të operimit në objekte private, Ministria e Punëve të Brendshme (MPB), sipas vendimit nr. 187/2025 të datës 05.02.2025, e ka ndarë hapësirën e nevojshme për Zyrën Kombëtare të Auditimit (ZKA) në kompleksin“ ish-Rilindja”, për ta mundësuar realizimin e funksioneve të përcaktuara me Kushtetutë dhe ligj”, thuhet në njoftimin e Zyrës Kombëtare të Auditimit.
Por, zgjidhje nuk i është bërë Ministrisë së Bujqësisë. Nga ky dikaster thonë se kanë shtruar disa kërkesa, të fundit më 28 prill 2025.
“MBPZHR-ja e përfaqësuar nga znj. Venera Çerkini, sekretare e Përgjithshme më datën 28 prill 2025 kemi parashtruar kërkesë në Ministrinë e Punëve të Brendshme, përkatësisht i jemi drejtuar znj. Fahrije Tërnava, Sekretare e Përgjithshme, lidhur me shqyrtimin e kërkesës sonë për shqyrtim të transferimit të stafit të MBPZHR-së nga objekti aktual me qira në një objekt publik/qeveritar, por sipas përgjigjes nga MBP-ja, kjo çështje aktualisht nuk mund të realizohet”, thuhet në përgjigjen e kësaj ministrie.
Kjo ministri paguan 27 mijë e 300 euro në muaj qira apo 327 mijë euro në vit. Po aq kjo ministri paguan edhe për qiranë ku ishte e vendosur deri vonë Agjencia për Zhvillim të Bujqësisë.
Rreth 300 mijë euro në vit për qira paguan edhe Agjencia për Krahasim e Verifikim. Në të njëjtën ndërtesë private është i vendosur edhe Fondi i Sigurimit Shëndetësor, për qiranë e të cilit në vit paguhen afro 160 mijë euro.
Në vitin 2023, kostoja e qirave për institucionet publike ishte 11 milionë e 495 mijë euro.
