Presidenti i Shqipërisë, Bajram Begaj do të qëndrojë në Kosovë më 16 dhe 17 shkurt, në vizitë zyrtare.
Me këtë rast, Policia ka njoftuar se do të do të kujdeset për ruajtjen e rendit dhe qetësisë publike si dhe rregullimin e trafikut, gjatë kohës së lëvizjes së eskortës dhe kohës së qëndrimit të delegacionit në Kosovë.
“Për të mundësuar qarkullim të lirë të eskortës sipas itinerarit të lëvizjes, ardhjes më datë 16 shkurt në orët e pasdites në pikën kufitare Vërmicë, si dhe zhvillimin e aktiviteteve sipas agjendës zyrtare së vizitës deri në kthim më datë 17 shkurt në orët e mbrëmjes, Policia e Kosovës do të bëjë ndërprerje të përkohshme të qarkullimit të trafikut (në intervale të shkurtra kohore) të disa segmenteve rrugore (ku pritet të kalojë eskorta), ku edhe mund të ketë riorientim të trafikut në rrugë alternative”, thuhet në njoftimin policor.
Në prag të përvjetorit të 18-të të Pavarësisë, të hënën vizitë zyrtare në Prishtinë ka zhvilluar edhe kryeministri i Shqipërisë, Edi Rama, i cili është takuar me presidenten Vjosa Osmani dhe me homologun e tij, Albin Kurti.