Franca kufizon konsumimin e alkoolit për shkak të valës së madhe të të nxehtit

Një valë e ashpër të nxehti që po përfshin pjesën më të madhe të Evropës ka detyruar Francën të vendosë një ndalim të pjesshëm të konsumimit të alkoolit, Gjermaninë të lëshojë paralajmërime mbarëkombëtare dhe Spanjën të mbyllë një zonë për tifozët e futbollit, ndërsa temperaturat po afrohen me nivele rekord.

Në Francë pritet që të dielën 35 nga 96 departamentet ose rajonet e saj të shpallnin alarmin e kuq për valën e të nxehtit, me temperatura nga 39 deri në 40 gradë celsius që priteshin nga jugperëndimi, përmes rajonit të Parisit deri në Burgonjë, ndërsa në disa zona temperaturat mund të arrinin edhe 41 gradë celsius.

Pas një mbledhjeje urgjente, kryeministri Sebastien Lecornu ka vendosur të ndalojë paraprakisht konsumimin e alkoolit të dielën gjatë festivaleve vjetore Fête de la Musique dhe në ngjarje të tjera publike që do të zhvilloheshin në ato 35 rajone. Megjithatë, autoritetet në Paris urdhëruan që parqet të qëndronin të hapura gjatë gjithë ditës dhe natës.

Paralajmërime për temperatura të larta u shpallën në pjesën më të madhe të Gjermanisë, ku temperaturat po afroheshin me 38 gradë celsius. Shërbimi meteorologjik gjerman DWD ka paralajmëruar se kombinimi i vapës dhe lagështisë mund të shkaktonte stuhi të forta.

Përtej Alpeve, temperaturat që priteshin të arrinin 36–37 gradë celsius po ndryshojnë jetën e përditshme dhe turizmin në disa qytete italiane.

Vizitorët prisnin në radhë nën diellin përvëlues jashtë Koloseut, ndërsa vapa e verës në Romë e kishte kthyer vizitën turistike në një provë qëndrueshmërie. Disa kërkonin lehtësim në hapësirat më të freskëta nëntokësore poshtë mbetjeve pjesërisht të fshehura të Tempullit të Klaudit.

Në qytetin verior të Bolonjës, një nga më të nxehtit në gadishullin italian, njerëzit freskoheshin duke spërkatur fytyrat me ujë te Shatërvani i Neptunit i shekullit të 16-të.

Ndërkohë, në Spanjë, federata e futbollit ka vendosur të mbyllë zonën e tifozëve që kishte ngritur me ekrane gjigante në sheshin Plaza de Colón në Madrid. Kjo do të thotë se tifozët do të duhet ta ndjekin ndeshjen e Spanjës kundër Arabisë Saudite në Kupën e Botës diku tjetër.

Shkencëtarët thonë se ndryshimet klimatike po i bëjnë valët e të nxehtit më të shpeshta dhe më intensive në të gjithë Evropën, duke rritur rrezikun e emergjencave shëndetësore dhe të ndërprerjeve ekonomike gjatë muajve të verës.

Edhe kostoja ekonomike e vapës ekstreme po tërheq gjithnjë e më shumë vëmendje.

Guvernatori i Bankës së Francës, Emmanuel Moulin, ka thënë se efektet afatshkurtra mbi rritjen ekonomike janë “disi të paqarta”, duke përmendur si uljen e produktivitetit ashtu edhe rritjen e konsumit të energjisë. 

Megjithatë, ai ka paralajmëruar se në afat të mesëm valët e të nxehtit ndikojnë negativisht në aktivitetin ekonomik.