Nga sot e deri më 6 dhjetor, qytetarët që jetojnë jashtë Kosovës mund të regjistrohen për të votuar në zgjedhjet e parakohshme të 28 dhjetorit.
Platforma për t’u regjistruar do të hapet pasditen e sotme, ndërsa votuesit jashtë vendit kanë mundësi të zgjedhin njërën nga tri format e votimit.
Ata mund të votojnë fizikisht në përfaqësitë diplomatike të Kosovës nëpër botë, mund të dërgojnë fletëvotimin përmes postës në kutinë postare të KQZ-së në Kosovë apo në ndonjërën prej kutive postare të KQZ-së që do të hapen jashtë vendit.
Megjithatë, bashkatdhetarët duhet të kenë kujdes një gjë: votimi fizik në Kosovë, pra në vendbanimet e tyre në Kosovë, nuk do të jetë i mundur nëse paraprakisht regjistrohen për të votuar njërën prej formave të përmendura më lartë.
Për votuesit që zgjedhin postën, KQZ-ja do t’ua dërgojë fletëvotimet në adresat e tyre të banimit.
Pikërisht ky proces është bërë shkak i përplasjeve mes anëtarëve të KQZ-së për ditë me radhë. Derisa anëtarët e PDK-së, LDK-së e AAK-së insistonin që fletëvotimet t’u dërgohen fizikisht votuesve jashtë Kosovës, siç përcaktohet me rregulloren e KQZ-së, kryesuesi Kreshnik Radoniqi e anëtarët e Lëvizjes Vetëvendosje kërkonin që fletëvotimi të mund të shkarkohet online, me arsyetimin se dërgimi fizik i tij do të dështojë e nuk do të mund të zhvillohet brenda afatit të përcaktuar.