Eksperti i sigurisë, Fatmir Çollaku, ka thënë se siguria nacionale dhe rendi kushtetues në Kosovë janë në gjendje stabile. Megjithatë, ai ka thënë se humbja e kohës me formimin e institucioneve mund ta prekë edhe sektorin e sigurisë në kuptim të gjerë të funksionimit.
Në “Interaktiv” të KTV-së, profesori i kriminalistikës ka thënë se nuk pengohet aspekti operativ i Policisë apo i Agjencisë së Inteligjencës. Megjithatë, sipas tij, mungon mbikëqyrja nga komisioni parlamentar.
“Në Komisionin parlamentar do të duhej të raportohej sa herë që ka nevojë apo kur ka momente që mund të interferojnë në cenim të sigurisë nacionale a rendit kushtetues. Por tash s’është aktiv... Dëmi është shumë dimensional. Moskonstitimi ka pasoja shumë dimensionale. Edhe në zhvillim, edhe në politikë, diplomaci, por edhe në siguri në kuptim të gjerë, sepse në vija të ngushta ato janë të strukturuara”, ka thënë Çollaku.
Eksperti i sigurisë megjithatë e ka vlerësuar stabile gjendjen në Kosovë. Ai ka thënë se rasti i vrasjeve të fundit e veprat tjera penale janë të pashmangshme si raste sporadike.
“Por gjendja e sigurisë mendohet në rendin juridik kushtetues dhe siguri nacionale. Nëse siguria është e qëndrueshme dhe rendi i pacenuar seriozisht, veprat penale që mund të ndodhin në kontekstin e sigurisë dhe juridik janë normale sepse pashmangshëm mund të ndodhin. Sa është numri i tyre tregon intensitetin e krimit dhe rrezikimit”, ka thënë ai.
Ai ka kritikuar edhe liderët apo institucionet që dalin e japin konstatime për çështjen e sigurisë së përgjithshme pa verifikuar apo pa u bazuar mirë.