Inxhinieri Agron Dida, në një bashkëbisedim në podcastin PIKË me publicistin Veton Surroi, ka diskutuar potencialin e përdorimit të inteligjencës artificiale (IA) në arsimin e Kosovës, duke theksuar se kjo mund të përmirësojë ndjeshëm përparimin e nxënësve dhe të rrisë motivimin për të mësuar.
Dida ka treguar për një përvojë të suksesshme në Nigeri, ku përdorimi i veglave të IA në fushat problematike të gjuhës dhe të njohjes së tekstit ka sjellë përmirësim të ndjeshëm te nxënësit e dobët.
Ai theksoi se eksperimenti ishte pjesë e një studimi standardizues të PISA-s, në bashkëpunim me Bankën Botërore, i cili e konsideron këtë qasje shumë kredibile.
Dida argumentoi se për të riprodhuar këtë sukses në Kosovë, duhet të ekzistojnë disa faktorë: gatishmëria institucionale, kushtet digjitale (qasje në internet, pajisje teknologjike) dhe trajnim adekuat i arsimtarëve. Ai theksoi se, edhe pse infrastruktura e internetit në Kosovë është relativisht e mirë (78–80% depërtueshmëri), problemi mbetet te mjedisi institucional dhe mungesa e pajisjeve kompjuterike në shkolla, duke sugjeruar përdorimin e telefonave mobil si alternativë.
“Inteligjenca artificiale nuk do të zëvendësojë arsimin tradicional, por do të shërbejë si suplement, duke mbështetur nxënësit dhe mësuesit në mënyrë kreative”, ka thënë ai.
Ai propozoi ndryshime rrënjësore në metodologjinë e mësimdhënies, duke e kthyer arsimtarin në rol tutorësh që udhëzojnë nxënësit për të zgjidhur probleme reale, ndërsa nxënësit fitojnë përvojë praktike dhe aftësi për përdorimin e teknologjive të reja.
