Dy të akuzuar në rastin “Banjska” mbrohen në heshtje, tjetri deklarohet seancën tjetër

Dy të akuzuarit në rastin “Banjska” Vladimir Toliq dhe Blagoje Spasojeviq kanë vendosur që të mbrohen në heshtje, ndërsa i akuzuari Dushan Maksimoviq do ta japë mbrojtjen e tij në seacnën e radhës. 

Në seancën e mbajtur të premten, avokatja e Maksimoviqit, Jovana Filipoviq, ka theksuar se i mbrojturi i saj s’ka pasur mundësi të njihet me shkresat e lëndës dhe se do të deklarohet në seancën tjetër. 

Me këtë është pajtuar edhe i akuzuari. 

“E nderuara gjykatë, unë pajtohem me propozimin e mbrojtjes dhe është e nevojshme që njoftohem me video incizimet ashtu që të deklarohem në një seancë tjetër”, ka deklaruar Maksimoviq.

Propozimi i avokates Filipoviq është aprovuar nga kryetar i trupit gjykues Ngadhnjim Arrni.

“Seanca e sotme të ndërpritet dhe mbrojtja e të akuzuarit Dushan të jepet në një datë tjetër, pasi paraprakisht mbrojtja do ketë nevojë për konsultime më të zgjeruara që të japë mbrojtjen e tij”, ka theksuar Arrni.

Kurse dy të akuzuarit e tjerë Vladimir Toliq dhe Blagoje Spasojeviq si dhe avokatët e tyre kanë thënë se ata do ta hsfrytëzojnë të drejtën për t’u mbrojtur ne heshtje. 

Për rastin e sulmit në Banjskë të Zveçanit ku mbeti i vrarë rreshteri policor Afrim Bunjaku në Gjykatën Themelore për këtë rast janë duke u gjykuar Vlladimir Tolliq, Bllagoje Spasojeviq dhe Dushan Maksimoviq, tre nga 45 të akuzuarit për sulmin në Banjskë.

Që të tre të akuzuarit i kanë mohuar akuzat para gjykatës dhe pretenduan se nuk e kishin qëllim vrasjen e askujt, e aq më pak bashkimin e veriut të Kosovës me Serbinë, ashtu siç thotë aktakuza.

Përgjegjësinë për sulmin e armatosur e mori Millan Radoiçiq, ish-nënkryetar i Listës Serbe – partisë më të madhe të serbëve në Kosovë – që gëzon përkrahjen e Beogradit zyrtar.

Për Radoiçiqin dhe 41 të akuzuarit e tjerë të këtij rasti, që ndodhen në arrati, prokurorët kishin kërkuar gjykim në mungesë, por Gjykata Themelore e hodhi poshtë kërkesën e tyre si të “pabazuar”.