Ish-deputeti dhe analisti, Afrim Kasolli, ka thënë se ajo çfarë ndodhi në Kuvend ishte e pritur.
Sipas tij, PDK-ja u ndodh në situatë të palakmueshme politike pasi sipas tij, nuk arriti të vepronte në koherencë me deklaratat e saj.
“Ishte ditë e diel dhe Kurti i zuri në befasi, siç duket nuk kanë qenë esëll. Kërkuan pauzë, por kjo reflektonte se kishin shkuar krejtësisht të papërgatitur. PDK-ja ra në kontradiktë me vetveten”, ka thënë ai. “Unë jam i bindur që ndoshta edhe Lëvizja Vetëvendosje nuk do të donte që Basha të zgjidhej si kryekuvendar, por e luajti lojën mirë”.
Kasolli ka shtuar se partia që mori goditje në seancën e fundit, ishte PDK-ja.
Sipas tij, Vetëvendosje konsideron se konstituimi i Kuvendit është detyrë e të gjithë deputetëve.
“Kërkesa për 10 minuta pauzë nuk del jashtë rregullave procedurale por një parti serioze duhet të shkojë e përgatitur. Dihet cilët janë deputetët e Lëvizjes Vetëvendosje. Dje doli në sipërfaqe struktura kaotike e saj e punës sa i përket punës në Kuvend”, ka thënë ai.
Ka shtuar se nëse nuk konstituohet Kuvendi, kjo çështje do të shkojë sërish në Kushtetuese.
Sipas tij, duket se Lëvizja Vetëvendosje është e përgatitur për një skenar të tillë.
Kasolli ka thënë se problemi është politik dhe nuk është kushtetues.