Ushtarët e KFOR-it kanë vazhduar vendosjen e tabelave të reja përgjatë kufijve të Kosovës me Serbinë.
Këto tabela paralajmëruese, të vendosura në zona malore dhe pyjore, shënojnë qartë zonën e operimit të KFOR-it dhe ndihmojnë në uljen e rrezikut të kalimeve të paqëllimshme, thuhet në njoftimin e misionit të NATO-s.
“KFOR-i do të vazhdojë këto përpjekje për të promovuar ambient të sigurt dhe të qetë për të gjithë njerëzit në Kosovë, përmes patrullimeve të rregullta në veriun e Kosovës dhe pranë Vijës Administrative Ndarëse”, thuhet në njoftim.
Tutje thuhet se KFOR-i punon në bashkërendim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), si përgjegjës për sigurinë.
Vendosja e tabelave të reja nga KFOR-i ka filluar nga korriku.