Mbrojtësi i ish-presidentit Hashim Thaçit, avokati Luka Mishetiq, ka argumentuar se prokuroria nuk ka gjetur lidhje shkakore mes komunikatave dhe krimeve të pretenduara në aktakuzë. Fillimisht sqarime atij i kërkoi gjyqtari Christophe Barthe, i cili e pyeti se a argumentojnë se duhet të bëhet ndërlidhje mes secilit kryes me komunikatat.
“Në këtë rast po kërkoni lidhje mes një deklarate publike dhe vendimi të një kryesi për të kryer krimin, kjo është e vështirë në mos e pamundur nga pikëpamja ime në kuadrin e krimeve ndërkombëtare sepse ka pjesëmarrës të ndryshëm të niveleve të ndryshme – pra duhet identifikuar çdo kryerës fillimisht e më pas të vlerësohet nëse ky kryerës është ndikuar nga deklarata publike, këtë po thoni”, pyeti gjyqtari Barthe.
E avokati i Thaçit, Mishetiq, tha se një ndërlidhje e tillë nuk është e nevojshme për secilin kryerës, por se prokuroria nuk ka vërtetuar se komunikatat krijuan atmosferë që përbën kontribut të konsiderueshëm në kryerje të krimeve.
“Nuk po flas për secilin kryes, por duhet të ketë prova të mjaftueshme që të dalim në përfundimin se ka pasur kontibut të konsiderueshëm, prandaj kemi cituar Sheshelin... Duhet gjetur një lidhje, çfarëdo lloj lidhjeje për të dalë në përfundimin se atmosfera u shkaktua për shkak të një komunikate dhe që shkurtimisht pas një komunikate disa kryerës e kanë lexuar komunikatën në shtypin e mëngjesit dhe se për shkak të komunikatës ata e kanë kryer atë që kanë kryer dhe të dilet në përfundimin që 1, 2, 3, 4 ditë më pas, krimet janë kryer për shkak të tekstit të komunikatës. Nuk e kemi këtë provë. Asnjë provë të këtij lloji”, tha Mishetiq.
