Policia e Kosovës e ajo e Shqipërisë me marrëveshje për patrullime të përbashkëta gjatë sezonit turistik

Policia e Kosovës dhe ajo e Shqipërisë kanë nënshkruar marrëveshje për organizimin e shërbimeve të përbashkëta të policimit rrugor.

Sipas njoftimit të Policisë së Kosovës kjo është bërë me qëllim të përmbushjes sa më efektive të parametrave të sigurisë rrugore gjatë sezonit turistik 2026.

Marrëveshja është nënshkruar nga drejtori i Policisë së Kosovës Gazmend Hoxha dhe drejtori i Policisë së Shqipërisë, Skënder Hita.

Me këtë rast Hita ka thënë se të dy policitë për vite kanë pasur bashkëpunim shembullor të bazuar në besim të ndërsjellë. “Ky partneritet ka dhënë rezultate konkrete në terren, në luftën kundër krimit të organizuar, trafikut të armëve, kemi pasur disa operacione të suksesshëm ku janë kapur një sërë armësh”, është shprehur Hita.

Ndërsa Hoxha ka thënë se fokusi i tij dhe i Policisë së Kosovës ka qenë siguria në trafik dhe te ulja e numrit të aksidenteve me fatalitet.