(E përditësuar 11:08) - Në mbledhjen e Këshillit Prokurorial të Kosovës është marrë vendim për shkarkimin e ushtruesit të detyrës së kryeprokurorit të Shtetit, Besim Kelmendi, një ditë pasi u intervistua nga Prokuroria Speciale si dëshmitar për masakrën e Reçakut.
Vendimi është marrë me 5 vota për.
Në vendin e tij është emëruar prokurori Agron Qalaj.
Kelmendi dje u intervistua nga Prokuroria Speciale si dëshmitar për masakrën e Reçakut. Ai demantoi raportimet se ka qenë bashkëpunëtor i gjyqtares hetuese të rastit të Reçakut, Danica Marinkoviq. Ai në një konferencë shtypi ka thënë se gjatë periudhës së luftës në Kosovë, ka punuar në Gjykatën e Qarkut në Prishtinë dhe këtë e ka shfrytëzuar për t’i ofruar dokumente Këshillit për Mbrojtjen e të Drejtave dhe Lirive të Njeriut si dhe mediave për mbulimin e krimeve që bënte Serbia.
Kelmendi në fillim të mbledhjes së KPK-së e quajti këtë një plan kundër tij.
“Sepse njerëzit të cilët janë duke planifikuar gjithë këtë lojë, janë pjesë e gjithë një plani. Ky është plan, sepse dëshirojnë ta kenë njeriun që kanë interes të pastër. Dëshirojnë me pas një njeri i cili dje gjatë seancës dëgjimore si dëshmitar, ka qenë prezent jo njëherë, por dy herë - për me shiku a jam unë ai që po flas e për çka po flas. Ju lutem, çdo gjë për këtë plan të tmerrshëm të një grupi për një interes të një individi të cilin e kam përkrah vazhdimisht, është mëse e turpshme dhe joligjore”, tha Kelmendi.
Propozohet shkarkimi i Kelmendit pas intervistimit nga Prokuroria Speciale
Zëvendëskryesuesja e Këshillit Prokurorial të Kosovës ka propozuar shkarkimin e ushtruesit të detyrës së Kryeprokurorit të Shtetit, Besim Kelmendi.
Zv.kreysuesja Jehona Grantolli ka thënë se këtë po e propozon pas zhvillimeve të fundit, ku Kelmendi u intervistua në cilësinë e dëshmitarit nga Prokuroria Speciale lidhur me masakrën e Reçakut.
E Kelmendi ka thënë se kjo po bëhet me tendencë dhe për qëllime e interesa të dikujt.
“Duke pasë parasysh zhvillimet e fundit lidhur me detyrën e U.D. Besim Kelmendit, i cili është pozicionuar së fundmi me një grup të anëtarëve të KP dhe i cili më nuk përfaqëson unitetin e sistemit prokurorial, për të cilin është zotuar në marrjen e detyrës. Duke pasur parasysh edhe kërkesat e ndryshme që janë publike, që Këshilli Prokurorial të kërkojë shkarkimin e U.D.-së, kërkoj që kjo pikë të futet në mbledhje, me propozimin për shkarkimin e tij”, ka thënë Grantolli në mbledhjen e KPK-së.
Kelmendi i ka reaguar duke thënë se fjalimin duket se ia ka shkruar dikush tjetër e jo vetë Grantolli.
“Sot nga zëvendëskryesuesja e Këshillit Prokurorial doli një propozim, të cilin ajo e lexoi, por nuk dihet se kush ia ka shkruar. Ndoshta ai është zëdhënësi i tyre në media. Një dhe i vetëm. Kam dëgjuar shumë mirë çka ke thënë. Nëse është dikush pjesë e grupeve, tregoni cili grup është”, deklaroi Kelmendi.
Kelmendi tha se kjo është e planifikuar në mënyrë që në këtë pozitë të vijë njeriu i besueshëm i atyre që po dëshirojnë ta shkarkojnë.
Ndërkaq, Grantolli tha se Kelmendi po e fyen, duke i kërkuar ta lëshojë sallën, me arsyetimin se po qëndron në sallë në konflikt interesi.
Kelmendi tha që opinioni duhet ta dijë që e gjithë kjo është një plan.
“Sepse njerëzit të cilët janë duke planifikuar gjithë këtë lojë, janë pjesë e gjithë një plani. Ky është plan, sepse dëshirojnë ta kenë njeriun që kanë interes të pastër. Dëshirojnë me pas një njeri i cili dje gjatë seancës dëgjimore si dëshmitar, ka qenë prezent jo njëherë, por dy herë - për me shiku a jam unë ai që po flas e për çka po flas. Ju lutem, çdo gjë për këtë plan të tmerrshëm të një grupi për një interes të një individi të cilin e kam përkrah vazhdimisht, është mëse e turpshme dhe joligjore”, tha Kelmendi.
Pesë anëtarët që lëshuan mbledhjen e KPK-së: Prapa puçit ndaj Kelmendit qëndron Blerim Isufaj
Visar Krasniqi, anëtar joprokuror i Këshillit Prokurorial të Kosovës nga shoqëria civile, ka thënë se vendimi për shkarkimin e u.d. të kryeprokruorit të shtetit, Besim Kelmendi, është i paligjshëm. Krasniqi ishte një prej pesë anëtarëve të KPK-së që lëshuan mbledhjen të enjten ku po shqyrtohej propozimi për shkarkimin.
Krasniqi ka theksuar se vendimi nuk ka efekt juridik. Ai ka shtuar se pesë anëtarët që lëshuan mbledhjen nuk u informuan më pas se mbledhja po vazhdonte me pesë anëtarët e tjerë.
Ai është shprehur se Kelmendi vazhdon detyrën, pavarësisht vendimit të nxjerrë sot.
“Pesë anëtarë të KPK sot kanë tentuar të marrin vendim për shkarkim të u.d. të kryeprokurorit pa pasur kuorum të kërkuar sipas ligjit. Votimi me pesë anëtarë nuk përbën mbledhje të konstituuar dhe rrjedhimisht nuk përbën vendim me efekt juridik. Fakt ky që u konstatua edhe nga vetë kryesuesi i KPK, Hajdaraj, kur me largimin e 5 anëtarëve konstatoi se nuk ka kuorum”, ka thënë ai në konferencë për media.
Krasniqi ka thënë se çdo vendim i marrë në mungesë kuorumi është akt inekzistent dhe nuk prodhon kurrfarë efekt juridik, ndërsa ka shtuar se largimi i anëtarëve ka qenë i vetmi mekanizëm për ta ndaluar një “akt të paligjshëm”.
Siç ka thënë ai, ky ka qenë një plan prapa të cilit qëndron kryeprokurori i Prokurorisë Speciale, Blerim Isufaj.
“Propozimi për shkarkimin e Kelmendit bazohej në një logjikë të qartë të një puçi institucional duke tentuar të vendoset përfundimisht mbi udhëheqjen e Prokurorisë së Shtetit jashtëligjshëm. Në një frymë edhe u.d. e tha në takim se prapa gjithë këtij organizimi qëndron kryeprokurori i Prokurorisë Speciale Blerim Isufaj”.
Krasniqi u ka bërë thirrje institucioneve relevante për vlerësimin e situatës juridike, ndërkohë që Policisë i ka bërë thirrje që të kujdeset për sigurinë e anëtarëve të KPK-së.
“Ftojmë institucionet relevante të vlerësojnë shkeljet e kryera sot nga 5 anëtarët e KPK-së. Ftojmë AKI për të vlerësuar situatën dhe ruajtjen e sigurisë juridike në vend. Ftojmë Policinë që të kujdeset për nivelin e sigurisë për anëtarët që sot jemi këtu. Organet e drejtësisë të vlerësojnë gjendjen juridike pas këtyre veprimeve. Ftojmë organizatat e shoqërisë civile dhe mediat të monitorojnë zhvillimet që cenojnë funksionimin e sundimit të ligjit”.