Qytetarët ankohen për rritje të ndotjes së ajrit në Obiliq dhe në Prishtinë

Banorë të Prishtinës dhe Obiliqit kanë vërejtur rritje të ndotjes së ajrit ditëve të fundit, të cilët si shkaktarë kryesorë po i konsiderojnë termocentralet e Korporatës Energjetike të Kosovës. Qytetarët thonë se ndotja po bëhet më e dukshme, sidomos gjatë temperaturave të larta

Rritje të ndotjes së ajrit ditëve të fundit kanë vërejtur qytetarët e Prishtinës e të  Obiliqit dhe si shkaktarë i konsiderojnë termocentralet dhe rrymimet e ajrit. 

Faik Tërholli, banor i fshatit Mazgit të Obiliqit, tha se javën e fundit tymtarët e KEK-ut po ndotin më shumë se zakonisht.

“Kohëve të fundit ka qenë pak e përmirësuar gjendja, nuk ka pasur aq shumë tym të përzier me pluhur. Tash, kohëve të fundit, qe një javë e tutje, po vazhdon kështu në këtë mënyrë”, tha Tërholli. 

E Musli Mjeku u shpreh se ndotja po shkaktohet edhe nga moti i nxehtë.

“Mua ma merr mendja që për shembull sikur sot, që është dita shumë e nxehtë, shumë zheg, duhet me qenë ndotja më shumë. Të flitet për ndotjen duhet të bëhen disa analiza, të cilat ne nuk mund t’i bëjmë”, tha Mjeku. 

Mexhit Krasniqi nga Breznica e Obiliqit theksoi se niveli qendror i pushtetit nuk po e adreson problemin e ndotjes nga termocentralet në Obiliq e si rrjedhojë po e pësojnë qytetarët.

“Probleme ka çdoherë për shkak të ajrit, nuk është ndërmarrë diçka prej nivelit qendror që të eliminohen sadopak. Po kryesisht sezonin e vjeshtës ka erëra më shumë, po vërehen edhe në shëndetin e njerëzve, ndikon direkt. Në fakt, për nga ajri, është komuna më e ndotur në shtetin e Kosovës, dashtë zoti që të ndërmerret diçka që së paku të eliminohet”, tha Krasniqi. 

Në Institutin Kombëtar të Shëndetit Publik thonë se ndotja nuk shkaktohet vetëm nga tymi që nxjerrin oxhaqet e KEK-ut.

Në një përgjigje, nga ky institut theksuan se ndotja më e madhe e ajrit është gjatë dimrit, mirëpo edhe në këtë kohë ka burime të shumta.

“Edhe pse ndotja e ajrit është më e theksuar gjatë muajve të ftohtë, burime potenciale të ndotjes vazhdojnë të jenë prezente edhe në këtë periudhë. Ndër to përfshihen: Trafiku rrugor i pakontrolluar, djegia ilegale e mbeturinave, ndërtimet e vazhdueshme pa kontroll, pluhuri nga rrugët e papastra, aktivitetet bujqësore dhe industriale”, u tha nga IKSHPK. 

Lidhur me ankesat e qytetarëve, Korporata Energjetike e Kosovës nuk ka kthyer përgjigje që nga e hëna.