Reduktimet e energjisë elektrike kanë filluar sërish në tërë vendin, pavarësisht njoftimit të para një jave të Operatorit të Sistemit, Transmisionit dhe Tregut të Energjisë Elektrike (KOSTT) për normalizim dhe stabilizim të gjendjes në sistemin elektroenergjetik.
Ky operator ka thënë se po përballet me vështirësi të mëdha si pasojë e devijimeve në rrjetin interkonektiv evropian, teksa kërkesa reale për konsum tejkalon atë nominale. Pra Kosova po shpenzon më shumë energji sesa që ka lajmëruar në rrjetin evropian.
“KOSTT bën thirrje që nominimet të reflektojnë saktë kërkesën reale dhe të korrigjohen menjëherë, për të shmangur devijimet dhe për të ruajtur sigurinë e sistemit. Në këtë situatë, KOSTT është detyruar që të kërkojë aplikimin e kufizimit të ngarkesës, si masë e fundit për garantimin e operimit të sigurt, deri në përmirësimin e gjendjes”, thuhet në njoftimin e lëshuar nga KOSTT-i. “Kjo situatë është e papranueshme dhe cenon stabilitetin e sistemit elektroenergjetik”.
Sipas rrjetit evropian të energjisë, aktualisht blloqet B2 dhe A3 të KEK-ut janë jashtë funksionit.
Ditë më parë në Zyrën e Rregullatorit për Energji kanë paralajmëruar masa ndaj operatorëve të licencuar që shkaktuan devijime në rrjetin interkonektiv evropian, në përmasa të papara më parë.
Rreth një javë më parë KOSTT-i ka njoftuar për normalizim dhe stabilizim të gjendjes në sistemin elektroenergjetik, duke thënë se është rritur prodhimi vendor i energjisë dhe se janë implementuar masa të koordinuara për balancimin e ngarkesës dhe përmirësimin e parametrave të furnizimit me energji.
KESCO: Temperaturat e ulëta po rrisin ndjeshëm konsumin e rrymës, po detyrohemi të importojmë
Kompania për Furnizim me Energji Elektrike në Kosovë (KESCO) ka njoftuar se sistemi elektroenergjetik aktualisht po operon në kushte të vështira si pasojë e temperaturave të ulëta dhe rritjes së ndjeshme të konsumit të energjisë elektrike.
Sipas njoftimit, përdorimi i shtuar i energjisë për ngrohje ka ndikuar drejtpërdrejt në rritjen e kërkesës, ndërsa në periudhat kur prodhimi vendor mbetet i ulët, nevoja për import të energjisë rritet ndjeshëm.
Megjithatë, KESCO thekson se mundësitë për sigurimin e energjisë nga importi janë të kufizuara dhe mbulimi i plotë i kërkesës në çdo moment është i vështirë.
“Temperaturat e ulëta dhe përdorimi i shtuar i energjisë elektrike për ngrohje kanë ndikuar në rritje të theksuar të konsumit. Në periudhat kur prodhimi vendor mbetet i ulët, nevoja për import të energjisë elektrike rritet ndjeshëm. Megjithatë, mundësitë për sigurimin e energjisë nga importi janë të kufizuara për shkak të kushteve teknike të sistemit elektroenergjetik në të cilin operon Kosova, duke e bërë të vështirë mbulimin e plotë të kërkesës në çdo moment”, thuhet në njoftim.
KESCO bën të ditur se është vazhdimisht e angazhuar në shfrytëzimin e të gjitha mundësive për sigurimin e energjisë elektrike, përfshirë kontratat afatgjata dhe blerjet në tregjet afatshkurtra.
Kompania tutje u ka bërë thirrje të gjithë konsumatorëve që të përdorin energjinë elektrike me kujdes dhe të ndërmarrin masa konkrete për kursimin e saj, veçanërisht gjatë orëve të pikut.