Krenar Xhaferi, deputet i Lidhjes Demokratike të Kosovës, ka thënë se partia e tij qëndron pas propozimit që si zgjidhje për ngërçin e shkaktuar politik është formimi i një qeverie teknike, pa përfshirjen e liderëve politikë, për një vit.
Ai ka thënë për “60 Minuta” në KTV të premten se LDK-ja do të votojë kundër propozimit për formimin e Qeverisë Kurti 3 të dielën në Kuvend. Xhaferi ka akuzuar Vetëvendosjen dhe kryetarin e saj Albin Kurti për mungesë të pjekurisë politike.
“Ne kemi qenë të qartë që nga fillimi. Nuk kemi marrëveshje me Lëvizjen Vetëvendosje dhe do të jemi të pranishëm e do të votojmë kundër formimit të Qeverisë së re. Unë besoj se Kurti do të duhej këto ditë t’i shfrytëzonte për diskutime me partitë që kanë shprehur vullnet politik në këtë drejtim, por nuk kemi parë interesim të tillë dhe siç po duket nuk do të ketë qeveri Kurti 3”, ka thënë ai. “Mendoj se Qeveria Kurti dhe VV-ja janë treguar të papjekur politikisht në një situatë të tillë sepse liderët politikë duhet të shohin përtej vetvetes, për interes shtetëror edhe në një situatë të tillë politike në të cilën jemi, që nuk ka numra për krijimin e qeverisë së re”.
Xhaferi ka thënë se nuk pret përpjekje nga opozita që ta formojë Qeverinë, nëse Kurti dështon të dielën. E sipas tij, kjo çon drejt zgjedhjeve, për të cilat ka thënë se me “një logjikë të thjeshtë s’do të duhej” të vinin. Ai ka thënë se ka “shumë formula” që të dilet nga situata.
“Ne mund të prodhojmë zgjedhje të reja, do të ketë momentum të njëjtë pothuajse, me më pak numra për Lëvizjen Vetëvendosje, por do të prodhohet një situatë e njëjtë pas zgjedhjeve. Ne si LDK kemi propozuar qeveri të përbashkët, teknike, me liderët larg qeverisë së zgjedhur”, ka thënë ai duke shtuar se kjo qeveri do të duhej të zgjaste një vit deri në zgjidhjen e tri çështjeve. Këtu Xhaferi ka thënë se qeveria teknike do të duhej të punonte në zgjidhjen e çështjes ekonomike. “Ne jemi buzë kolapsit ekonomik”, ka thënë ai. Tutje ai ka vlerësuar se qeveria teknike do të duhej të merrej me përmirësim të raporteve me partnerët perëndimorë dhe në fund edhe zgjidhjen e çështjes së presidentit, pasi Vjosa Osmanit i skadon mandati në mars.
“Në një logjikë që lideri politik mendon përtej vetvetes do të duhej të pranonte një qeveri njëvjeçare e pas saj të krijohet situatë e re politike – vendi do të mund të prodhonte qeveri të re. Me formatin që jemi mund të shkojmë në shumë palë zgjedhje, por jo në zgjidhje të problemit”, ka thënë në fund ai.
Seanca e jashtëzakonshme për çështjen e qeverisë do të mbahet të dielën me fillim prej orës 10:00.
Kryetarit të Vetëvendosjes, Albin Kurti, i kanë mbetur edhe dy ditë kohë ligjore për ta prezantuar kabinetin e ri para deputetëve të Kuvendit të Kosovës. Si fitues i zgjedhjeve të 9 shkurtit, ai ka marrë mandatin nga presidentja e Kosovës, Vjosa Osmani, për formimin e Qeverisë së re të Kosovës.
Ende është e paqartë nëse Kurti i ka 61 votat e nevojshme për të formuar ekzekutivin e ri.
Nëse LVV-ja nuk arrin t’i bëjë 61 vota, presidentja ka detyrën që brenda dhjetë ditësh t’i ftojë partitë për konsultime dhe të vendosë për mandatarin që ka shanset më të mëdha për të formuar qeverinë. Nëse as pas përpjekjes së dytë Qeveria nuk mund të formohet, presidentja, sipas Kushtetutës, duhet të shpallë zgjedhje të reja, që duhet të mbahen brenda 40 ditësh.
VV-ja i ka bërë ftesë zyrtare për koalicion LDK-së, por kjo parti ka refuzuar. Ndërkaq me Nismën është pranuar se kanë pasur bisedime, por në VV i kanë cilësuar të larta kërkesat e partisë së Fatmir Limajt, që ka kërkuar postin e kryeparlamentarit.