Rahoveci 029 e Vëllaznimi kërkojnë pikët e “shpëtimit”

Katër xhiro para fundit të stinorit të rregullt në Superligën e Kosovës në basketboll, gara për të shmangur pozitën e fundit ka mbetur më interesantja.

Rahoveci 029 dhe Vëllaznimi i Gjakovës janë skuadrat më të rrezikuara për rënie nga Superliga.

Të dy skuadrat i kanë nga 32 pikë në pozitat shtatë e tetë. Këtë edicion skuadra e pozitës së shtatë, përkatësisht të parafundit, nuk luan në plejaut. Nuk luan as në plejof, por mbetet në Superligë. Ndërkohë skuadra e pozitës së fundit, përkatësisht të tetë, bie nga Superliga.

Rahoveci 029 dhe Vëllaznimi kanë ndeshje shumë të rëndësishme të shtunën, në kuadër të xhiros së 25-të të elitës kosovare të basketbollit.

Fillimisht nga ora 17:00, “vreshtarët” e presin Pejën në “Mizahir Isma”.

Ndërkohë nga ora 19:30, skuadra gjakovare luan në kryeqytet ndaj Borës.

Edhe për Pejën e Borën pikët janë me shumë rëndësi. Sidomos për Pejën, që renditet e pesta në tabelë me 34 pikë. Peja synon pozitë sa më të mirë për plejof, por me humbje eventuale, futet në  mesin e skuadrave të rrezikuara.

Sigal Prishtina është e gjashta me 33 pikë, pra vetëm një më shumë se Vëllaznimi e Rahoveci 029 dhe një më pak se Peja.

Golden Eagle Ylli është i katërti me 35 pikë. Bora tashmë ka siguruar plejofin, por synon të mbetet në vendin e tretë, që do t’i jepte avantazhin si vendas në çerekfinale të plejofit. Bora i ka 37 pikë.

Bashkimi është i dyti me 40 pikë, derisa Trepça është e paarritshme në vendin e parë me 45 pikë. Kampionia në fuqi, Trepça, në plejof do të futet nga pozita e parë.

Xhiroja e 25-të vazhdon të dielën me ndeshjen mes Golden Eagle Yllit dhe Trepçës. Kjo ndeshje, e rëndësishme sidomos për Yllin, zhvillohet në Suharekë nga ora 17:00.

Kjo xhiro mbyllet me ndeshjen e së hënës mes Sigal Prishtinës dhe Bashkimit. Luhet në Pallatin e Rinisë nga ora 19:30.

Prishtina ka humbur pesë ndeshjet e fundit si nikoqire dhe është në pozitë goxha kritike.

Superliga në basketboll – XXV

E shtunë

Rahoveci 029 – Peja (17:00)

Bora – Vëllaznimi (19:30)

E diel

Golden Eagle Ylli – Trepça (17:00)

E hënë

Sigal Prishtina – Bashkimi              (19:30)

1. Trepça             24           45

2. Bashkimi         24           40

3. Bora  24           37

4. G. E. Ylli            24           35

5. Peja  24           34

6. S. Prishtina     24           33

7. Vëllaznimi      24           32

8. Rahoveci 029 24           32