-
Nga:
BBC
- 8 shkurt 2026 11:37
- Shpërndaje në:
Gjashtë persona janë arrestuar pasi policia u përplas me protestuesit në Milano, një nga qytetet që ka organizuar Lojërat Olimpike Dimërore, gjatë ditës së parë të garave.
Mijëra njerëz dolën në rrugët e qytetit në veri të Italisë të shtunën për të protestuar kundër një sërë çështjesh, përfshirë koston e jetesës. Disa protestues hodhën flakadanë dhe gurë drejt policisë, ndërsa forcat e rendit u kundërpërgjigjën me topa uji.
Ngjarja vjen pasi qeveria italiane ashpërsoi ligjet për protestat, pas një proteste fundjavën e kaluar në Torino, ku sipas të dhënave zyrtare u plagosën më shumë se 100 policë. Ndërkohë, autoritetet po hetojnë edhe një sabotim të dyshuar në rrjetin hekurudhor të veriut të Italisë të shtunën.
Zëvendëskryeministri Matteo Salvini i cilësoi personat e përfshirë në përplasjet në Milano si “kriminelë”. Ai tha se, vetëm pak ditë pas dhunës së rëndë në Torino, janë regjistruar sërish përplasje dhe sulme ndaj forcave të rendit, duke theksuar se qeveria është krenare për paketën e re të sigurisë që, sipas tij, do të lejojë ndërhyrje më efektive kundër huliganëve dhe kriminelëve.
Protesta në Torino, e thirrur si reagim ndaj dëbimit të një qendre sociale jozyrtare, fillimisht ishte paqësore, por më pas u kthye në e dhunshme kur grupe të armatosura u përballën me policinë. Më shumë se 30 persona u arrestuan, ndërsa një polic u sulmua me çekiç, veprim që kryeministrja Giorgia Meloni e cilësoi si tentativë për vrasje.