Dhjetë persona do të dalin para gjyqit për thashethemet se Brigitte Macron është burrë

Dhjetë persona do të dalin para gjyqit në Paris të hënën për ngacmim online të Brigitte Macron, duke shënuar fazën e fundit në një betejë ligjore në të dyja anët e Atlantikut kundër pretendimit të rremë se zonja e parë franceze është një burrë me emrin Jean-Michel Trogneux.

Procesi gjyqësor francez vjen pasi presidenti, Emmanuel Macron, dhe gruaja e tij ngritën një padi për shpifje në SHBA në fund të korrikut, në lidhje me një thashethem të përsëritur online se Brigitte Macron ka lindur burrë.

Padia amerikane e Macronit sulmon ato që ai i ka quajtur "gënjeshtra të verifikuara si të rreme dhe shkatërruese" që përsëriten online nga podkasterja e krahut të djathtë Candace Owens, se Brigitte Macron, 72 vjeç, ka lindur mashkull. 

Padia thotë se provat e hodhën poshtë qartë këtë "narrativë groteske", e cila ishte bërë "një fushatë poshtërimi global".

Gjyqi francez për ngacmim online është i ndarë nga veprimi gjyqësor amerikan dhe lidhet me një padi ligjore të paraqitur nga Brigitte Macron në vitin 2024. 

Dhjetë të pandehur, tetë burra dhe dy gra, të moshës 41 deri në 60 vjeç do të gjykohen në gjykatën penale të Parisit, të akuzuar për ngacmim online që synon Brigitte Macron. Nëse dënohen, ata përballen me deri në dy vjet burgim.

Të pandehurit, të cilët mohojnë të gjitha shkeljet, janë akuzuar se kanë bërë komente të shumta keqdashëse në lidhje me gjininë dhe seksualitetin e Brigitte Macron, madje duke e barazuar diferencën e saj në moshë me bashkëshortin e saj me "pedofili", sipas prokurorëve.

Padia amerikane e familjes Macron thotë se akuza se Brigitte Macron ka lindur si burrë me emrin Jean-Michel Trogneux është plotësisht e rreme dhe Trogneux në fakt është vëllai 80-vjeçar i Brigitte Macron.

Ai jeton në qytetin verior francez të Amiens, ku është rritur me Brigitte dhe katër vëllezër e motra të tjerë në një familje të famshme për biznesin e saj lokal të çokollatës. 

Ai ishte i pranishëm në publik së bashku me Brigitte në dy inaugurimet presidenciale të Emmanuel Macronit, në 2017 dhe 2022.