Sulm me armë zjarri në një plazh në Sidnei

Personat e armatosur prapa sulmit në Sidnei ishin baba e bir

Photo: Associated Press

Komisionari i Policisë së New South Wales, Mal Lanyon, ka thënë se dy personat prapa sulmit në një plazh në Sidnei ishin baba e bir. 

Një 50-vjeçar është qëlluar për vdekje në vendin e ngjarjes, ndërsa i biri i tij i moshës 24-vjeçare gjendet në spital në gjendje kritike. 

Në sulmin në plazhin Bondi në një festë hebraike janë vrarë të paktën 15 persona. 

Lanyon ka thënë se 50-vjeçare kishte armë me leje dhe i kishte gjashtë armë të regjistruara në emrin e tij. Besohet se ato armë u përdorën në sulm. 

Viktimat janë të moshave nga 10 deri 87-vjeçare. 40 persona mbesin duke marrë trajtim në spital. 
  
 

Shkon në 16 numri i të vdekurve nga sulmi në Sidnei të Australisë

Photo: Associated Press

Të paktën 16 persona kanë mbetur të vrarë, në mesin e tyre edhe një sulmuesi i dyshuar,  dhe 40 të tjerë të plagosur, nga një sulm i armatosur që ka ndodhur të dielën në një plazh në Sidnei të Australisë. 

Sulmi ka ndodhur gjatë kohës sa në plazhin Bondi po festohej festa hebraike e Hannukahs, çka bëri që autoritetet të konstatojnë se sulmuesit kishin cak komunitetin hebraik. 

Një nga të dyshuarit për sulmin është qëlluar për vdekje nga policia, ndërkaq i dyti, i cili është arrestuar, është në gjendje kritike. Sulmuesi i vdekur është i moshës 50-vjeçare, ndërsa i plagosuri 24-vjeçar. 

Kryeministri i Australisë, Anthony Albanese, ka deklaruar në një konferencë për media se ndihej i shkatërruar nga sulmi, teksa ka shprehur mbështetjen e tij për komunitetin hebre. 

“Si kryeministër, në emër të të gjithë australianëve, i them komunitetit hebre se ne qëndrojmë me ju dhe riafirmojmë sonte se keni të drejtë të jeni krenarë për atë që jeni dhe për atë që besoni. Keni të drejtë të adhuroni, të studioni, të jetoni dhe të punoni në paqe dhe siguri, dhe na pasuroni si komb. Nuk duhet të duroni kurrë humbjen që keni pësuar sot”, ka deklaruar Albanese. 

Policia ka thënë se oficerët po shqyrtonin një numër gjërash të dyshimta, përfshirë disa pajisje shpërthyese të improvizuara të gjetura në veturat e njërit prej të dyshuarve.

Qindra njerëz ishin mbledhur për ngjarjen që festonte fillimin e festivalit tetëditor të Hanukkahs.
Pamjet që kanë qarkulluar në rrjetet sociale tregonin dy persona të armatosur me armë të gjata që qëllonin nga një urë këmbësorësh që të çonte në plazh. 

Një klip dramatik i transmetuar në televizionin australian tregonte një kalimtar që pengon njërin nga sulmuesit duke iu hedhur sipër dhe duke ia marrë pushkën nga duart.

Të pranishmit në festival shihen teksa ikin dhe fshihen ndërkohë që dëgjohen të shtënat. 

“Në fillim mendova se ishin fishekzjarrë. Thjesht nuk e pret fare këtë lloj gjëje në Bondi, ose në përgjithësi në jetë për të qenë i sinqertë, por sidomos në Bondi. Kështu që ishim pak të hutuar. Por pastaj, me sa duket, ndërsa të shtënat vazhdonin, e kuptuam se diçka nuk ishte në rregull. Dhe pastaj policia reagoi mjaft shpejt. Të shtënat vazhduan për një kohë të gjatë, dukej si disa minuta”, është shprehur një dëshmitar. 

Udhëheqësit botërorë kanë shprehur ngushëllime dhe kanë dënuar sulmin.

Sekretari i Shtetit i SHBA-së, Marco Rubio, ka thënë në një postim në X se “Shtetet e Bashkuara dënojnë fuqimisht sulmin terrorist në Australi që synonte një festë hebraike”. Sipas tij, antisemitizmi nuk ka vend në këtë botë.

Ndërkaq, kryeministri i Izraelit, Benjamin Netanyahu ka thënë se ata si popull po përballen me një betejë globale kundër antisemitizmit. 

Sulmet masive në Australi janë jashtëzakonisht të rralla. Një sulm i vitit 1996 në qytetin tasmanian të

Port Arthur, ku një person i armatosur vrau 35 persona, e shtyu qeverinë të shtrëngonte në mënyrë drastike ligjet për armët dhe e bëri shumë më të vështirë për australianët të siguronin armë zjarri.

 

Momenti kur një kalimtar ndalon njërin nga sulmuesit në Sidnei

Ka shkuar në 12 numri i të vdekurve nga një sulm i armatosur të dielën në një plazh në Sidnei, ku po zhvillohej një festival hebarik. 

Në mesin e të vdekurve është edhe njëri nga sulmuesit, teksa një tjetër është në gjendje të rëndë për jetën. 

Pamjet e postuara në mediat sociale tregojnë një nga personat e dyshuar të armatosur në plazhin Bondi duke u penguart nga një kalimtar rasti i cili ia rrëmben pushkën.

Autoritetet australiane e kanë cilësuar sulmin “terrorist” i cili kishte cak komunitetin hebarik. 

12 të vrarë në Sidnei, sulmi kishte cak komunitetin hebraik

Photo: Associated Press

Ka shkuar në 12 numri i të vdekurve nga sulmi i armatosur në një plazh të Sidneit, të dielën, kanë bërë të ditur autoritetet. Ndërkohë, 29 të tjerë janë dërguar në spital.

Incidenti është cilësuar si sulm terrorist nga policia.

“Sulmi ishte projektuar për të synuar komunitetin hebraik të Sidneit”, ka bërë të ditur policia

Kryeministri i New South Wales, Chris Minns, ka konfirmuar se nga 12 të vrarët në sulm, është edhe njëri nga sulmuesit teksa një tjetër është arrestuar. 

“Ajo që duhej të kishte qenë një natë paqeje dhe gëzimi u shkatërrua nga një sulm i tmerrshëm dhe i lig”, ka thënë Minns. 

Në vendin ku ka ndodhur sulmi ishin mbi 1,000 njerëz të pranishëm duke festuar festën hebraike të Hanukah.

Një njësi shpëtimi për asgjësimin e bombave është vendosur në vendngjarje pasi policia gjeti një automjet për të cilin beson se ka disa pajisje shpërthyese të improvizuara.

Të shtënat masive janë të rralla në Australi.