Brenda vetëm pak muajsh, Irene Roggero Ugues pa sesi sjellja e vajzës së saj 12-vjeçare, Rossella, ndryshoi rrënjësisht. Ajo që filloi si kërkimi i përmbajtjeve që pasqyronin gjendjen e saj emocionale në rrjetet sociale, përfundoi me një tragjedi të rëndë: vetëvrasjen e vajzës në vitin 2024.
Vetëm pas vdekjes së Rossellës, prindërit arritën të zhbllokonin pajisjet e saj elektronike. Aty zbuluan se vajza kishte përdorur rrjetet sociale shumë më tepër sesa kishin menduar. Mes gjetjeve ishte edhe një profil sekret në Instagram me emrin “Just a dead pers0n (vetëm një person i vdekur)”, ku shkronja “o” ishte zëvendësuar me numrin zero, raportoi “Reuters”.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoSipas familjes, në shtator të vitit 2023 Rossella kishte filluar të kërkonte përmbajtje me tema depresive, të cilat pasqyronin gjendjen e saj emocionale. Algoritmet e platformave sociale vazhduan t’i sugjeronin materiale të ngjashme, duke krijuar cikël të pandërprerë përmbajtjesh të lidhura me vetëlëndimin dhe depresionin. Pesë muaj më vonë, vajza humbi jetën.
Familja e Rossellës është pjesë e një grupi familjesh italiane që kanë ngritur padi kolektive kundër kompanive Meta, pronare e Facebookut dhe Instagramit, si dhe kundër TikTokut. Kjo konsiderohet si nisma e parë ligjore kolektive në Itali që sfidon drejtpërdrejt kompanitë e rrjeteve sociale dhe mënyrën se si funksionojnë algoritmet e tyre.
Nga ana tjetër, Meta dhe TikToku kanë mohuar akuzat se shërbimet e tyre janë të dëmshme për të rinjtë. Të dyja kompanitë deklarojnë se investojnë vazhdimisht në masa mbrojtëse, duke hequr përmbajtje të rrezikshme, kufizuar ekspozimin ndaj materialeve problematike dhe duke ofruar mjete për kontrollin prindëror.
Debati për ndikimin e rrjeteve sociale tek të rinjtë po intensifikohet në të gjithë Evropën. Britania e Madhe ka njoftuar planet për të ndaluar përdorimin e rrjeteve sociale për fëmijët nën moshën 16-vjeçare, ndërsa Bashkimi Evropian po forcon zbatimin e Aktit për Shërbimet Digjitale, duke kërkuar mbrojtje më të madhe për të miturit në internet.
Ekspertët vazhdojnë të diskutojnë mbi ndikimin e rrjeteve sociale në shëndetin mendor. Organizata Botërore e Shëndetësisë paralajmëron se përdorimi problematik i mediave sociale po rritet mes adoleshentëve dhe lidhet me mirëqenie më të ulët, probleme me gjumin dhe rreziqe të tjera shëndetësore.
Disa psikologë thonë se ndikimi i rrjeteve sociale tek adoleshentët është kompleks dhe nuk mund të shpjegohet vetëm përmes algoritmeve apo kontrollit prindëror.
Për Irene Roggero Ugues, pjesëmarrja në padi ka një qëllim të qartë: të paralajmërojë familjet e tjera për rreziqet që ajo thotë se nuk i kuptoi deri kur ishte tepër vonë.
“Ne nënvlerësuam disa rreziqe dhe nuk e dinim se ekzistonin. Të tjerët ende mund të veprojnë. Nuk ka kuptim ta mbaj këtë histori për vete”, ka thënë ajo.