-
Përktheu:
Flutura Gashi-Mehmeti
- 10 qershor 2026 07:40
- Shpërndaje në:
Garda Revolucionare e Iranit ka thënë se ka kryer sulme kundër një baze amerikane në Jordani dhe 21 objektivave të tjera në Gjirin Persik të mërkurën, në hakmarrje për sulmet amerikane rreth Ngushticës së Hormuzit, kanë raportuar mediat iraniane.
Përplasjet shënojnë një nga përshkallëzimet më të mëdha, që kur të dy vendet kanë rënë dakord për armëpushim në prill.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoSulmet iraniane, të cilat përfshinin sulme në Kuvajt dhe Bahrein, erdhën pasi ushtria amerikane tha në X se kishte synuar mbrojtjen ajrore iraniane, stacionet e kontrollit tokësor dhe vendet e radarëve të pranë ngushticës, në përgjigje të rrëzimit të një helikopteri ushtarak amerikan Apache të martën pranë Hormuzit.
Presidenti amerikan, Donald Trump, ka bërë përgjegjës Iranin për sulm ndaj helikopterit, duke u zotuar për përgjigje.
"Unë besoj se përgjigja duhet të jetë shumë e fortë, shumë e fuqishme”, ka thënë Trumpi për ABC News të martën.
Përshkallëzimi i dhunës thellon dyshimet rreth perspektivës për një marrëveshje për t'i dhënë fund luftës që filloi më 28 shkurt me sulme të përbashkëta SHBA-Izrael kundër Iranit.
Teherani është përgjigjur duke qëlluar fqinjët e Gjirit që strehojnë bazat amerikane dhe pothuajse ka bllokuar Ngushticën e Hormuzit, një kanal jetësor për naftë dhe gaz.
Sulmet e fundit të SHBA-së kanë zgjatur rreth katër orë, sipas Komandës Qendrore të SHBA-së. Një zyrtar amerikan ka thënë se pothuajse 20 objektiva iraniane janë goditur.
Media shtetërore e Iranit ka raportuar se ishulli Qeshm dhe qyteti port i Sirik në Ngushticën e Hormuzit janë sulmuar.
Tinguj shpërthimesh u dëgjuan në Bandar Abbas aty pranë, dhe më vonë në afërsi të Jask, pranë hyrjes së ngushticës, raportoi media iraniane, duke cituar burime lokale dhe banorë.
Garda Revolucionare e Iranit ka thënë se në përgjigje kishte sulmuar katër vende në bazën amerikane al-Azraq në Jordani duke përdorur raketa me rreze të gjatë veprimi, ka raportuar media iraniane.
Forcat e armatosura jordaneze kanë thënë të mërkurën se kishin kapur dhe rrëzuar pesë raketa të lëshuara nga Irani drejt al-Azraq. Ushtria ka shtuar se mbeturinat nga operacioni i kapjes kanë rënë në territorin jordanez, por nuk shkaktuan lëndime ose dëme materiale.
Trump: Irani po vonohet për marrëveshjen, do të paguajë çmimin
Photo: Associated Press
Presidenti i SHBA-së, Donald Trump, ka thënë në një postim në rrjetet sociale të mërkurën se Irani do të “paguajë çmimin” pasi “u desh shumë kohë për të negociuar një marrëveshje”.
“Irani është vetëm fjalë dhe asnjë veprim. Ngacmuesi i Lindjes së Mesme është i vdekur. Ata kanë marrë shumë kohë për të negociuar një marrëveshje që do të kishte qenë e shkëlqyer për ta, tani do të duhet të paguajnë çmimin”, ka shkruar Trumpi në Truth Social.
Presidenti nuk ka specifikuar se çfarë do të përfshinte “çmimi”, por kjo vjen pasi SHBA-ja ka njoftuar se kishte nisur një valë të re sulmesh kundër Iranit të martën pasi një helikopter Apache i ushtrisë ishte rrëzuar pranë Ngushticës së Hormuzit.
Një zyrtar amerikan i ka thënë CNN-it të martën se sulmet e reja ishin menduar si “një e shtënë paralajmëruese” ndaj Iranit dhe se SHBA-ja beson se ato nuk do të pengojnë negociatat për t'i dhënë fund luftës.
Ndërkohë, zëdhënësi i ministrisë së Jashtme iraniane, Esmail Baghaei, ka thënë të mërkurën se Teherani po rishikon negociatat me SHBA-në pas sulmeve të fundit.
Irani thotë se po rishikon negociatat me SHBA-në pas sulmeve të fundit
Tehrani zyrtar po “rishikon” negociatat me Shtetet e Bashkuara, në dritën e sulmeve amerikane kundër Iranit natën e së martës, citohet të ketë thënë zëdhënësi i ministrisë së Jashtme iraniane, Esmaeil Baghaei, sipas Rrjetit Studentor Iranian të Lajmeve (SNN).
Baghaei ka akuzuar SHBA-në dhe Izraelin për “shkelje të përsëritura të armëpushimit” dhe ka thënë se diplomacia nuk mund të zhvillohet “në një vakum”, duke shtuar se nevojitet “një mjedis minimal ku diplomacia mund të funksionojë” që negociatat të përparojnë.
“Fatkeqësisht, Shtetet e Bashkuara po e minojnë këtë proces përmes mesazheve kontradiktore, ndryshimeve të shpeshta në qëndrimet dhe kërkesat e tyre, si dhe përmes shkeljeve të përsëritura të armëpushimit”, citohet të ketë deklaruar ai.
Baghaei ka shtuar se edhe Izraeli ka treguar mungesë sinqeriteti përmes sulmeve të përsëritura në Liban.
Irani ka njoftuar të mërkurën se kishte ndërmarrë sulme hakmarrëse ndaj objektivave amerikane në rajon, për shkak të sulmeve amerikane mbi Iran, pas rrëzimit të një helikopteri ushtarak amerikan të martën pranë Ngushticës së Hormuzit.
Presidenti amerikan, Donald Trump, ka shkruar të martën në Truth Social, se Irani e kishte sulmuar helikopterin dhe se SHBA-ja për këtë do të përgjigjej.
Shumë pak kohë pas këtij postimi, ushtria amerikane ka deklaruar se kishte përfunduar sulmet kundër Iranit, të cilat sipas saj ishin një përgjigje ndaj rrëzimit të një helikopterit.
Ky zhvillim tregon se tensionet midis Iranit dhe SHBA-së mbeten të larta dhe mund të komplikojnë përpjekjet diplomatike për rifillimin e bisedimeve mes dy vendeve.