Ushtria izraelite ka kryer sulme të rënda ajrore në Libanin jugor të enjten, pasi lëshoi urdhra evakuimi për disa vende, duke thënë se grupi i armatosur libanez Hezbollah po përpiqej të rindërtonte kapacitetet e tij ushtarake atje, raportoi Reuters.
Urdhrat dhe sulmet ndodhën pavarësisht një marrëveshjeje armëpushimi të arritur një vit më parë, e cila kishte për qëllim t’i jepte fund më shumë se një viti luftimesh midis Izraelit dhe Hezbollahut të mbështetur nga Irani, dhe pas muajsh përpjekjesh të ushtrisë libaneze për të pastruar pozicionet e Hezbollahut në jug.
Ministria libaneze e Shëndetësisë tha se një person është vrarë dhe një tjetër është plagosur në bombardimet e pasdites.
Zëdhënësi i ushtrisë izraelite, Avichay Adraee, lëshoi tre urdhra të njëkohshëm evakuimi në orën 15:00 sipas orës lokale të enjten, me harta që tregonin ndërtesat në fshatrat Aita al-Jabal, Al-Tayyiba dhe Tayr Debba. Dy urdhra të tjerë erdhën më vonë për qytete të tjera në jug.
Sulmet ajrore filluan rreth një orë pas urdhrave.
"Jemi në një situatë shumë të rrezikshme; nëse gjërat vazhdojnë të shkojnë në këtë drejtim atëherë çdo shpresë humbet. Askush nuk e di se ku do të çojnë pasojat e këtyre çështjeve", tha Farid Nahnouh, kryetar i bashkisë së Tayr Debba.
Forca e Përkohshme e OKB-së në Liban tha se sulmet ajrore izraelite përbëjnë shkelje të qarta të rezolutës 1701 të Këshillit të Sigurimit, të miratuar në vitin 2006 me qëllim ruajtjen e paqes përgjatë kufirit Liban-Izrael.
Sulmet e së enjtes shkatërruan një biznes hekurishteje në qytetin Abbasiyeh të Libanit jugor.