Murgu i lartë budist dërgohet në paraburgim për dyshime për përdhunim të një të miture

Një nga murgjit budistë me rangun më të lartë në Sri Lanka është arrestuar dhe dërguar në paraburgim nën dyshimet për përdhunim dhe sulm seksual ndaj një vajze 15-vjeçare.

Pallegama Hemarathana Thero mban një nga pozitat më të respektuara në botën budiste – atë të kryepriftit dhe kujdestarit të tetë vendeve të shenjta në Sri Lanka.

Ai u arrestua pas një kërkese nga autoriteti kombëtar për mbrojtjen e fëmijëve, i cili më herët kishte kritikuar policinë për mosarrestimin e tij, pavarësisht se ishte përmendur si i dyshuar në rast.

Pallegama Hemarathana nuk ka komentuar publikisht mbi akuzat. Ai pritet të dalë para gjykatës më 12 maj.

Edhe nëna e viktimës së dyshuar është arrestuar dhe është dërguar në paraburgim, pasi akuzohet për ndihmë dhe bashkëpunim në abuzim.

Pallegama Hemarathana po trajtohej në një spital privat në Colombo kur u arrestua të shtunën. Gjykatësi urdhëroi që ai të transferohej në spitalin e burgut në Colombo.

Gjykata gjithashtu lëshoi urdhër ndaj autoriteteve të emigracionit për të siguruar që Pallegama Hemarathana të mos tentojë të largohet nga vendi.

Është e pazakontë që murgjit budistë – aq më pak një figurë kaq e lartë – të arrestohen në Sri Lanka, ku ata gëzojnë ndikim të madh politik dhe respektohen shumë nga shoqëria.