Nepali ka hequr vendimin me të cilin e ndalonte përdorimin e mediave sociale, vendim ky që shkaktoi protesta dhe çoi në përleshje me policinë si pasojë e të cilave humbën jetën të paktën 19 persona dhe më shumë se 100 të tjerë u lënduan.
Një javë para ndalimit, kishte filluar një fushatë në rrjetet sociale e njohur si “fëmijët nepo”, e cila vendoste në qendër të vëmendjes stilin e jetesës luksoze të fëmijëve të politikanëve dhe akuzat për korrupsion, raporton BBC.
Kur qeveria vendosi të ndalojë 26 platforma të mediave sociale, duke përfshirë Facebook dhe YouTube, shpërthyen protesta me mijëra të rinj që sulmuan parlamentin në kryeqytetin Katmandu të hënën.
Disa rrethe tani janë nën shtetrrethim. Një ministër i qeverisë tha se ata e hoqën ndalimin pas një takimi urgjent vonë të hënën në mbrëmje për të adresuar kërkesat e protestuesve që i referoheshin vetes si “Gjenerata Z”.
Eskalojnë protestat në Nepal, i vihet flaka ndërtesës së parlamentit
Photo: Associated Press
Protestuesit kundër korrupsionit në Nepal kanë hyrë në ndërtesën federale të parlamentit të vendit në Katmandu.
Ata duket se i kanë vënë flakën ndërtesës, pasi shihet zjarr dhe tym që del nga ndërtesa, ndërsa turma të mëdha protestuesish janë të mbledhur në afërsi.
Protestuesit kanë sfiduar një shtetrrethim pasi zemërimi i tyre kundër qeverisë pas të shtënave vdekjeprurëse të së hënës nuk po jep shenja të zvogëlimit.
Qindra protestues kanë hyrë me forcë në ndërtesën e parlamentit të Nepalit në Katmandu.
Protestuesit pao kërcejnë dhe po brohorasin slogane rreth një zjarri në hyrje të ndërtesës, shumë prej tyre mbajnë flamurin e Nepalit.
Disa kanë hyrë brenda ndërtesës ku të gjitha dritaret janë thyer. Grafite dhe mesazhe antiqeveritare janë shkruar me bojë në pjesën e jashtme të ndërtesës.
Një mesazh në ndërtesë thotë: "Ju bëtë luftën e gabuar".
VIDEO:
In Nepal, politicians ban social media use and citizens burn down parliament. Politicians flee by helicopter. pic.twitter.com/6Sju9CH7Jm
Kryeministri i Nepalit jep dorëheqje mes protestave të dhunshme
Kryeministri i Nepalit, K.P. Sharma Oil, ka dhënë dorëheqje të martën, ka bërë të ditur një ndihmës i tij, në kohën kur protestuesit kundër korrupsionit sfiduan orën policore të pacaktuar dhe u përplasen me forcat e sigurisë, një ditë pasi 19 persona humbën jetën në protestat e dhunshme të shkaktuara nga ndalimi i rrjeteve sociale.
Qeveria e Olikut e hoqi ndalimin për rrjetet sociale pasi protestat morën përmasa të dhunshme, duke lënë të vdekur 19 persona dhe mbi 100 të plagosur, pasi policia përdori gaz lotsjellës dhe plumba gome për të ndaluar protestuesit që përpiqeshin të hynin në parlament të hënën.
Kjo valë e dhunës është më e rënda në dekada në këtë shtet të varfër himalajas, i cili ndodhet mes Indisë dhe Kinës dhe ka vuajtur prej kohësh nga pasiguria politike dhe paqëndrueshmëria ekonomike, veçanërisht pas protestave që çuan në përmbysjen e monarkisë në vitin 2008.
“Kryeministri ka dhënë dorëheqje,” tha për agjencinë Reuters ndihmësi i tij, Prakash Silwal – një veprim që fut vendin në një tjetër fazë pasigurie politike.
Më herët të martën, Oli kishte thirrur një takim me të gjitha partitë politike, duke thënë se dhuna nuk është në interes të vendit dhe se “duhet të kthehemi te dialogu i qetë për të gjetur zgjidhje për çdo problem.”
Megjithatë, zemërimi ndaj qeverisë nuk tregoi shenja të qetësimit, ndërsa protestuesit u mblodhën para parlamentit dhe në pjesë të tjera të kryeqytetit Kathmandu, duke sfiduar orën policore të pacaktuar të shpallur nga autoritetet.